समाजवादी पार्टी सरकारबाट बाहिरियो, उपप्रम उपेन्द्र यादव र मन्त्री इश्तियाक राईद्वारा राजीनामा

काठमाडौँ । उपप्रधानमन्त्रीसहित दुई मन्त्रालयको जिम्मेवारी लिएर सरकारमा रहेको समाजवादी पार्टी सरकारबाट बाहिरिएको छ । समाजवादी पार्टीका अध्यक्षसमेत रहनुभएका उपप्रधानमन्त्री एवम् कानुनमन्त्री उपेन्द्र यादव र शहरी विकासमन्त्री मोहम्मद इश्तियाक राईले आज दिउँसो प्रधानमन्त्रीलाई राजीनामा बुझाउँदै समाजवादी पार्टीले सरकार छोडेको हो ।

समाजवादी पार्टीका पदाधिकारीको आजै बसेको बैठकले सरकारबाट बाहिरिने निर्णय गरेको थियो। संविधान संशोधनको मागसहित समाजवादी पार्टी सरकारमा सहभागी भएको थियो।

संविधान संशोधन प्रस्ताव अस्वीकार गरेर सरकार दुईबुँदे सहमतिबाट पछि हटेको आरोप लगाउँदै उपप्रधानमन्त्री यादवले राजीनामा दिनुभएको हो । ‘सहमतिलाई एकतर्फी रुपमा तोडेको प्रष्ट भएकाले नैतिकताको आधारमा सरकारमा बसिरहन औचित्य नभएको हुँदा आजकै मितिबाट लागू हुने गरी उपप्रधानमन्त्री एवं कानूनमन्त्री पदबाट राजीनामा दिएको व्यहोरा अनुरोध छ’ राजीनामामा यादवले भन्नुभएको छ ।