जापानमा १२ वर्ष अघि पत्रकार महासंघ स्थापना गर्ने चितवनका पाँच पत्रकार सम्मानित

टोकियो, ३० फागुन । जापानको राजधानी टोकियोमा चितवनका पाँच जना पत्रकार सम्मानित हुनु भएको छ । जापानका लागि नेपाली राजदूत डा दुर्गा बहादुर सुवेदीले बिषेश समारोहका बीच उहाँहरुलाई सम्मान गर्नुभएको हो ।

कार्यक्रममा १२ वर्ष अघि जापानमा नेपाल पत्रकार महासंघको शाखा स्थापना गर्ने संस्थापकहरुलाई सम्मान गरिएको हो । सम्मानित हुनेहरुमा पत्रकारहरु संस्थापक अध्यक्ष तिलक मल्ल सहित चितवनका पत्रकार कृष्ण भण्डारी, हरिप्रसाद पोखरेल, कविकिरण न्यौपाने, बिनोदकुमार सापकोटा र भूषण घिमेरे रहनु भएको छ । उहाँहरु सबै नेपाल पत्रकार महासंघ जापान शाखाका संस्थापक हुनुहुन्छ ।

नेपालमा भने कृष्ण भण्डारी र हरिप्रसाद पोखरेल नेपाल पत्रकार महासंघ चितवनका पूर्व अध्यक्ष हुनुहुन्छ । पोखरेल वर्तमान जिल्ला र वाग्मती प्रदेशका सल्लाहकार समेत हुनुहुन्छ । कविकिरण न्यौपाने प्रेस चौतारी चितवनका पूर्व अध्यक्ष तथा नेपाल पत्रकार महासंघ, जापान शाखाका वर्तमान सल्लाहकार हुनुहुन्छ । बिनोदकुमार सापकोटा नेपाल पत्रकार महासंघ, जापान शाखाका वर्तमान सल्लाहकार एवं प्रेस चौतारी चितवनका पूर्व सचिव हुनुहुन्छ । भूषण घिमिरे भने नेपाल रहँदा नेपाल पत्रकार महासंघका केन्द्रीय सदस्य भईसक्नु भएको थियो ।

बाह्र वर्ष अघि नेपाल गएका हरिप्रसाद पोखरेल यसै कार्यक्रमको लागि जापान आउनु भएको हो । नेपाल पत्रकार महासंघ, जापान शाखाको स्थापना सन् २००३ मार्च १३ तारिकमा भएको थियो। महासंघले आफ्नो १२ वर्षको यात्रा पूरा गरेको छ। स्थापना दिवसको अवसरमा आईतवार अग्रज पत्रकारलाई सम्मान सहित शुभकामना आदानप्रदान समेत सम्पन्न भएको छ। कार्यक्रमका प्रमुख अतिथि समेत रहेका जापानका लागि नेपाली राजदूत डा दुर्गा बहादुर सुबेदीले जापानमा पत्रकार महासंघको जग बसालेको संस्थापकहरुलाई आदर र सम्मान गर्न पाउदा खुःशी लागेको बताउनुभयो ।

नेपाल पत्रकार महासंघ जापान शाखाका अध्यक्ष शान्तकुमार पहरीको अध्यक्षता सम्पन्न कार्यक्रम सचिव राजन गौतमले सञ्चालन गर्नुभयो । कार्यक्रममा महासंघकी उपाध्यक्ष इन्दिरा खनालले स्वागत मन्तव्य व्यक्त गर्नुभयो ।

कार्यक्रममा नेपाल पत्रकार महासंघ, जापान शाखाका संस्थापक अध्यक्ष तिलक मल्ल, संस्थापक सल्लाहकार भूषण घिमिरे , निर्वतमान अध्यक्ष मोहन घले , एनआरएनए एशिया प्यासिफिक उपसंयोजक ददिवल खड्का, नेपाली व्यवशायी संघ, जापानका अध्यक्ष बिजय थकाली, एनआरएनए जापानका अध्यक्ष शिवप्रसाद पौडेल, एनआरएनए जापानका संस्थापक अध्यक्ष राजन प्रधानाङ्ग, बलेवा समाज जापानकी उपाध्यक्ष शान्ति बस्नेत, जनजाती महासंघ जापानका अध्यक्ष संजिव राई, प्रवाशी नेपाली मञ्च जापानका अध्यक्ष कुलचन्द्र खरेल, जनसम्पर्क समिति जापानका सभापति रोशन केसी, अन्तराष्ट्रिय अधिवक्ता बलराम श्रेष्ठ, गल्कोट समाज जापानकी अध्यक्ष कालिका थापा लगाएतले शुभकामना मन्तव्य व्यक्त गर्नुभयो ।

बिभिन्न पेशा, व्यवशाय एवं अध्ययनको शिलशिलामा १ लाख ३० हजारको हाराहारीमा नेपाली रहेको जापानमा नेपाल पत्रकार महासंघको सदस्यता प्राप्त गरी आबद्ध हुनेको संख्या ६५ रहेको छ।