एनआरएनए अष्ट्रेलियाका महासचिव अधिकारीद्वारा राजदुतसँग भेट, समस्याबारे जानकारी

चितवन, २५ माघ । चितवनको रामपुरमा स्थायी घर भई अष्ट्रेलियाको क्यानवेरामा बसोबास गर्दै आउनु भएको गैरआवासीय नेपाली महासंघ (एनआरएनए) अष्ट्रेलियाका महासचिब राजु अधिकारीले नेपालका लागि अष्ट्रेलियन राजदुत फेलिसिटि वोल्कसँग भेट गर्नुभएको छ । भेटका क्रममा अधिकारीले राजदुत वोल्कलाई अष्ट्रेलियामा रहेका नेपालीहरुको समस्याका बारेमा विस्तृत जानकारी गराउनु भएको हो ।

भेटका क्रममा अधिकारीले अर्धदक्ष श्रमिक अष्ट्रेलिया लैजाने बिषयमा प्रक्रिया अघि बढाउँदा उपयुक्त हुने सुझाव दिनु भयो । विश्वका अन्य देशबाट श्रमिकहरु आउने गरेको तर नेपालका श्रमिक न्यून पारिश्रमिकमा खाडी मुलुकहरुमा बढी जाने गरेको भन्दै अधिकारीले यहाँका श्रमिकलाई अष्ट्रेलिया लैजान सके राम्रो आम्दानी गर्न सक्ने बताउनुभयो । नेपालीहरु काममा इमान्दार हुने भएकाले कम मिहिनेतमा अष्ट्रेलियामा धेरै आम्दानी गर्न सक्ने देखिन्छ ।

अष्ट्रेलियामा पछिल्लो समय नेपाली विद्यार्थीहरुको मनोवैज्ञनिक समस्या बढ्दै गएर आत्महत्यासम्म गर्ने गरेको भन्दै अधिकारीले त्यसको न्यूनिकरणका लागि आवश्यक पहल गर्न अनुरोध गर्नुभयो । उहाँले राजदुतावास र एनआरएन सहकार्य गरेर समस्या निवारणमा काम गर्न सकिने बताउनुभयो ।

अष्ट्रेलियाबाट नेपाल पर्यटक भित्र्याउने बिषयमा आवश्यक पहल कदमी र समन्वय गर्न राजदुत वोल्कलाई उहाँले आग्रह गर्नुभयो । सो क्रममा राजदुत वोल्कले सन् २०२२ मा अष्ट्रेलियाबाट २७ हजार पर्यटक नेपाल भित्रिएको र अधिकांश नेपालीमुलका रहेको जानकारी गराउनुभयो । थप पर्यटक भित्र्याउनका लागि गैर आवासीय नेपाली महासंघ र राजदुताबासले भूमिका खेल्न सक्ने बताउनुभयो । नेपाली मूल बाहेकका पर्यटक भित्र्याउन प्रचारात्मक रुपमा लाग्नुपर्नेमा छलफल भएको थियो । अष्ट्रेलियनहरु विश्वका अन्य देशहरुमा घुम्न बढी जाने गर्दछन् । उनीहरुलाई नेपाल ल्याउनसके यहाँको पर्यटन प्रबद्र्धनमा टेवा पुग्ने अपेक्षा गरिएको छ ।

अधिकारीले अष्ट्रेलियामा नेपाली समुदाय मनोरञ्जन भिसामा गैर कलाकार प्रबेश गराएर अबैध रुपमा बसेकोप्रति चिन्ता व्यक्त गर्नुभएको थियो । ४०८ भिसामा गएकाहरुमध्ये अवैध रुपमा छिरेकाहरुलाई रोक्न नसके नेपालीहरुको प्रतिष्ठामाथि आँच आउने उहाँले बताउनुभयो । यसलाई मानवतस्करीकै रुपमा लिएर कडाई गर्न राजदुत वोल्कलाई आग्रह गर्नुभयो ।

अधिकारीले राजदुतसँगै प्रधानमन्त्री पुष्पकमल दाहाल प्रचण्ड, पूर्व प्रधानमन्त्री शेरबहादुर देउवालगायतलाई भेट गरी नागरिकता विधेयक, अष्ट्रेलियामा रहेको नेपाली राजदुतावासमा जनशक्तिको अभावका कारण भएको कामको ढिलाई लगायतका विषयमा जानकारी गराउनु भएको थियो ।