चितवनमा महिलालाई बलात्कार गरी हत्या गरेको आराेपमा दुई पक्राउ

चितवन, ७ मंसिर । बलात्कार गरी महिलाकाे हत्या गरेकाे आराेपमा चितवन प्रहरीले दुई जनालाई पक्राउ गरेकाे छ । गाेरखा सिरानचाेक ठेगाना भएका हाल भरतपुर महानगरपालिका-२ तिनखाेले बस्ने २३ वर्षीय सन्दिप गुरूङ र सोही स्थानका विजय परियार पक्राउ परेका हुन।

जिल्ला प्रहरी कार्यालय चितवनका प्रवक्ता डीएसपी विजयराज पण्डितका अनुसार निर्वाचनकाे दिन आइतबार बिहान ६ बजेतिर भरतपुर-२ दुर्गामन्दिर चाेककाे प्रतिक्षालय पछाडि हाट बजार लाग्ने कम्पाउण्डसहितकाे चाैरमा ५५/६० वर्षकाे महिलाकाे शव फेला परेकाे थियाे । अवस्था हेर्दा हत्या गरेकाे आशंका बढेपछि प्रहरीले स्थानीयसँग साेधपुछ र ती ठाउँमा जडान भएका सीसी क्यामेराका फुटेज हेरेर घटनामा संलग्न भएका हुन सक्ने व्यक्तिकाे पहिचान गरेकाे हाे ।

प्रहरीले पहिला सन्दिपलाई नियन्त्रणमा लिएको थियो । उनैसँग साेधपुछ गरेपछि विजयलाई भरतपुरकाे क्षेत्रपुरबाट नियन्त्रणमा लिएकाे डीएसपी पण्डितले बताए । साेधपुछकाे क्रममा दुईजनाले महिलालाई जबर्जस्ती करणी गरेकाे र पछि ढुंगाले हानेर हत्या गरेकाे डीएसपी पण्डितकाे भनाइ छ । महिलालाई प्रहार गरेकाे ढुंगाे र अन्य प्रमाणहरू पनि प्रहरीले संकलन गरेकाे छ ।