चितवनमा ३ दिनदेखि टेलिकमको नेटवर्कमा समस्या

चितवन,२४ कार्तिक।  चितवनमा नेपाल टेलिकमको नेटवर्कमा समस्या देखिएको छ । भरतपुरमा नेपाल टेलिकमको अप्टिकल फाइबर काटिँदा तीन दिनदेखि नेटवर्कमा समस्या आएको हो । मोबाइलमा फोन नलाग्ने, बोलेको नबुझिने, इन्टरनेट नचल्ने गर्दा नेपाल टेलिकमका सेवाग्राही समस्यामा परेका छन् ।

सडक बिस्तारको क्रममा जथाभावी डोजर चलाएका कारण अप्टिकल फाइबर काटिएको दूरसञ्चार कार्यालय भरतपुरले जानकारी दिएको छ ।भरतपुरका दुई ठाउँ र नवलपुरको गैँडाकोटमा फाइबर काटिएको दूरसञ्चार कार्यालय भरतपुरका प्रमुख नविनकुमार मिश्रले जानकारी दिनुभयो । उहाँका अनुसार भरतपुर एयरपोर्ट अगाडि र सप्तगण्डकी क्याम्पस चोकमा भएको समस्या पत्ता लागेको छ भने गैँडाकोटमा अझै समस्या पत्ता लागेको छैन । भरतपुरको समस्या आज साँझसम्म समाधान गर्ने गरी काम भइरहेको उहाँले बताउनुभयो ।