चितवनमा मोबाईल एपबाट ट्याक्सी, अटो र बाइक बोलाउन सकिने ‘सवारी’ सञ्चालनमा

चितवन, २७ भदौ । जिल्लामा मोबाईल एपबाट बाइक,अटो र ट्याक्सी लगायतका सवारीसाधन बोलाउन र गन्तव्यमा पुग्न सकिने सेवा सुरु भएको छ । जी एण्ड जी ग्रुप प्रालिले चितवनमा ‘सवारी’ नामको एप मार्फत ट्याक्सी,अटो र बाइक सेवा प्रदान गर्न सुरु गरेको हो ।

कम्पनीले चितवनमा पहिलो पटक एप मार्फत सवारीसाधन बोलाउन सकिने र गन्तव्यमा पुग्न सकिने सेवा सुरु गरेको हो । भरतपुर महानगरपालिका १० हाकिमचोकमा कार्यालय रहेको कम्पनीले सुरुवातको चरणमा ६० वटा सवारीसाधनबाट सेवा दिन थालेको छ । कम्पनीका संस्थापक शेरबहादुर साहले यात्रुहरुले आजैदेखि एप डाउनलोड गरेर सेवा लिन सक्ने बताउनुभयो । यात्रुले एपमा गएर सवारी छनोट गरेपछि आफ्नो गन्तव्यसम्मको भाडा दर समेत जानकारी पाउने छन् ।

यात्रुको लागि ५ लाखसम्मको दुर्घटना बीमा र ५० हजारसम्मको मेडिकल बीमा गरिएको कम्पनीले जनाएको छ । सवारी बुक नगरी यात्रा गर्नेहरुको लागि भने कम्पनी जिम्मेवार नहुने साहले बताउनुभयो ।

यात्रुले सवारीसाधन बुक गरेको पाँच मिनेट भित्र सेवा पाउने कम्पनीका सह–संस्थापक रोहित यादवले बताउनुभयो । सवारीको सेवा २४सैं घण्टा संचालन हुनेछ । भाडादर बाइकको प्रति किलोमिटर २० रुपैँया, अटोको प्रति किलोमिटर ४५ रुपैँया र ट्याक्सीको प्रति किलोमिटर ५५ रुपैँया तोकिएको छ । कम्पनीले सवारीसाधन भएका चालकहरुले सवारी ड्राइभर एप डाउनलोड गरी निःशुल्क दर्ता गर्न सक्नेछन् । प्रति महिना चालकले ५० हजारभन्दा बढी कमाउन सक्ने कम्पनीको दाबी छ । कम्पनीले काठमाडौं, पोखरा, बुटवल र भैरहवापछि चितवनमा सेवा विस्तार गरेको हो ।