ठोरी आसपासमा भारी वर्षा, सतर्कता अपनाउन आग्रह

ठोरी,५ श्रावण। जल तथा मौसम विज्ञान विभाग अन्तर्गतको बाढी पूर्वानुमान महाशाखाले हाल पर्साको ठोरी र आसपासमा भारी वर्षा भइरहेको जनाएको छ ।

भारी वर्षाका कारण खोलामा आकस्मिक बाढी आउने हुँदा वरपरका बासिन्दालाई सतर्कता अपनाउन महाशाखाले अनुरोध गरेको छ ।सतर्कतका मध्यान्ह १२ बजेसम्म अपनाउन पर्ने महाशाखाले जनाएको छ ।

महाशाखाले भनेको छ, ‘पर्सा जिल्लाको ठोरी र आसपास पछिल्लो एक घण्टा अतिभारी बर्षा मापन भएको छ । सो क्षेत्र र आसपास भई बहने साना खोलामा आकस्मिक बाढी आउनुको साथै पर्सा जिल्लामा डुवान भईरहने होचा स्थानमा दिउँसो १२ बजे सम्म सतर्कता अपनाऔं ।’

वर्षासँगै ठुटे खोलामा आएको बाढीले कटान सुरु गरेको छ । स्थानीय सञ्चारकर्मी चिरञ्जिवी सापकोटाका अनुसार गए रातिदेखि नै आएको बढीले २० मिटर कटान गरेको छ । बाढीले कटान गर्दा पनि स्थानीय सरकार मौन बसेको स्थानीयको गुनासो छ ।