चितवनको पत्रकार कुट्ने विद्युतका हाकिमसहित ८ जनाविरुद्ध मुद्धा दर्ता

चितवन,१ श्रावण।  पत्रकारलाई कुटपिट गर्ने नेपाल विद्युत प्राधिकरण भरतपुर वितरण केन्द्रका प्रमुख राजीव कुमार सिंहसहित ८ जना कर्मचारीविरुद्ध मुद्धा दर्ता भएको छ ।

चितवन सञ्चालित नारायणी अनलाइनका सम्पादक तथा सञ्चारपत्र दैनिकका प्रकाशक कृष्ण आचार्यलाई कुटपिट गर्ने आठ जना विरुद्ध जिल्ला प्रहरी कार्यालय चितवनमा अभद्र व्यवहार मुद्धा दर्ता भएको हो । आज (आइतबार) दिउँसो आचार्यले दिएका ८ जनाविरुद्धको मुद्धा दर्ता भएको चितवनका प्रहरी प्रवक्ता, डिएसपी नरहरि अधिकारीले जानकारी दिए ।

उनीहरु मध्ये सात जना पक्राउ परिसकेका छन् । कार्यालयका प्रमुख सिंह भने पक्राउ पर्न बाँकी छ । पक्राउ पर्नेहरुमा केन्द्रका सुपरभाइजर इलेक्ट्रिकल आनन्दबहादुर कुँवर, दिवछ शाह, सिनियर मिटररिडर हेमन्त ढकाल, फोरम्यान इलेक्ट्रिकल तुलसी देवकोटा, लेखापाल मञ्जिलमान श्रेष्ठ, मिटररिडर हेमशङ्कर चौधरी र लेखापाल हरि पौडेल पक्राउ परेका हुन् ।

आचार्यमाथि शुक्रबार विद्युत कार्यालय परिसरमै आक्रमण भएको थियो । प्राधिकरणका कर्मचारीहरु कार्यालय भित्रै मदिरा पिएर बसेको खबर पाएपछि पत्रकार आचार्य सोही बिषयमा रिपोर्टिङ लागि गएका आचार्यलाई उनीहरुले कुटपिट गरेका हुन् ।

कर्मचारीहरुले साङघातिक आक्रमण गरेपछि आचार्यले पर्खाल नाघेर भागेर ज्यान जोगाउन सफल भएका थिए । आचार्य प्रेस चौतारी नेपाल चितवन शाखा उपाध्यक्ष समेत हुन् ।