नारायणगढमा ट्रकले स्कुटरलाई ठक्कर दिंदा एकको मृत्यु, एक घाईते

चितवन, २७ असार । भरतपुर महानगरपालिका वडा नं. १ पोखरा बसपार्क नजिकै ट्रकले स्कुटरलाई ठक्कर दिंदै एक जनाको मृत्यु भएको छ भने एक जना घाईते भएका छन् । घटनामा परी ईच्छाकामना गाउँपालिका वडा नं. ३ बस्ने २१ वर्षिय सन्दीप गुरुङको मृत्यु भएको हो ।

जिल्ला प्रहरी कार्यालय चितवनका अनुसार गए राती १ः३० बजेको समयमा पुल्चोकबाट मुग्लिन तर्फ जाँदै गरेको ना ५ ख ८४९७ नं. को ट्रकले भित्री सडकबाट पोखरा बसपार्क जाने मुख्य सडक पार गर्न लागेको ना २६ प ४८५१ नं. को स्कुटरलाई ठक्कर दिएको हो । घटनामा परी नवलपुर गैंडाकोट नगरपालिका वडा नं. ४ का २१ वर्षिय मनिस लामा गम्भीर घाईते भएका छन् । उनको चितवन मेडिकल कलेज भरतपुरमा उपचार भईरहेको छ ।

मृतक गुरुङको उपचारको क्रममा राती २ः५ बजे मृत्यु भएको हो । ठक्कर दिने ट्रक र चालकलाई प्रहरीले नियन्त्रणमा लिएको छ ।