अर्किड स्कूलमा नवप्रवेशी विद्यार्थीहरुलाई स्वागत

भरतपुर, १४ जेठ । भरतपुरस्थित अर्किड स्कूलले नवप्रवेशी विद्यार्थीलाई स्वागत गरेको छ । स्कूललले आज एक कार्यक्रमको आयोजना गरी स्वागत गरेको हो ।

स्कूलले गत वैशाख २६ गते नयाँ भर्ना हुन इच्छुक विद्यार्थीहरुको लागि प्रवेश परीक्षा र २७ गते अन्तरक्रिया (अन्तर्वार्ता) लिई ३१४ विद्यार्थीहरुमध्ये २२३ जना विद्यार्थी छनौट गरी भर्ना लिएको थियो । उक्त नयाँ भर्ना भएका २२३ जना विद्यार्थीहरुको लागि विशेष सांस्कृतिक कार्यक्रम आयोजना गरि स्वागत गरिएको हो ।

संचालक समितिका अध्यक्ष गोपाल पराजुलीको अध्यक्षतामा आयोजित कार्यक्रममा सहप्राचार्य ओमराज मैनालीले स्वागत मन्तव्य राख्नु भएको थियो । प्राचार्य डा खेम आचार्यले नव प्रवेशी विद्यार्थीहरुलाई विद्यालयको साझा लक्ष्य, विद्यार्थीहरुले पालना गर्नुपर्ने संहिता, असल आचरण, चरित्र निर्माण सम्बन्धी प्रेरणादायी कुराहरु राख्नु भएको थियो ।

कार्यक्रममा अतिरिक्त क्रियाकलाप विभागकी संयोजक प्रतीक्षा श्रेष्ठले कार्यक्रम संचालन गर्नुभएको थियो भने नवआगन्तुक विद्यार्थीहरुलाई टीका, पुष्पगुच्छा र ग्रिटिंग कार्ड प्रदान गरी स्वागत गरिएको थियो। कार्यक्रममा नृत्य तथा गायन, भेषभूषा प्रदर्शनी र प्रहसन आदिद्वारा मनोरन्जन प्रदान गरिएको थियो।