भरतपुर महानगरका वडाध्यक्षहरु भन्छन् : विकासको लहर ल्याउन सहज बन्यो

भरतपुर,२६ बैशाख –  वैशाख,भरतपुर महानगरका वडाध्यक्षहरुले वडास्तरीय बजेट बाँडफाडमा राजनीतिक पूर्वाग्रह नभएको दाबी गरेका छन् । ५ वर्षको अवधिमा महानगरले वडाकै आवश्यकताका आधारमा बजेट विनियोजन गरेर वडाको समग्र विकासमा योगदान पु¥याएको बताएका छन् । अब बन्ने मेयर, उपमेयरले बजेट विनियोजनमा विगतमा जस्तै समान सोच राखेर बजेट बाँडफाड गर्न उनीहरुले सुझाएका छन् ।

कांग्रेसबाट निर्वाचित वडाध्यक्षहरुले वडातहसम्म विकासको लहर भित्र्याउन मेयर, उपमेयरले खेलेको भूमिकाको समेत उनीहरुले प्रशंसा गरेका छन् । वडा नम्बर ३ का वडाध्यक्ष चन्द्रमित्र पण्डितले वडामा ढल तथा नाला व्यवस्थापनमा धेरै प्रगति भएको बताउनुभयो । उहाँले महानगर नेतृत्वले वडाध्यक्ष कुन दलका भनेर भेदभाव नगरी बजेट विनियोजन भएको बताउनुभयो ।

वडा नम्बर ८ का वडाध्यक्ष दामोदर न्यौपानेले वडाबाट सिफारिस भएका योजनाहरु बजेट अभावमा फिर्ता गर्नुनपरेको बताउनुभयो । “२९ वडाकै समान विकासमा महानगर नेतृत्व प्रतिवद्ध बनेको थियो”, उहाँले भन्नुभयो, “नगरस्तरीय योजनामार्फत पनि वडाको विकासमा सघाउने काम भएका थिए ।”

वडा नम्बर १४ का वडाध्यक्ष ओमप्रसाद पोखरेलले वडास्तरीय बजेटको अतिरिक्त नगरस्तरीय योजनामा समेत वडाहरुलाई समान दृष्टिले सहयोग पुगेको बताउनुभयो । प्रहरी स्कुल, आर्युवेदिक अस्पताल लगायतका ठुला योजनाहरु वडामा लागु हुन लागेकोमा खुशी व्यक्त गर्नुभयो । वडा नम्बर १९ का वडाध्यक्ष कर्णबहादुर गुरुङले शहरी खानेपानी आयोजनाका लागि वडामा ५७ करोड बजेट परेको बताउनुभयो । उहाँका अनुसार खानेपानी आयोजनाका लागि ४ हजार ५ सय मिटर पाइपलाइन विस्तार भैरहेको बताउनुभयो ।

वडा नम्बर २७ का वडाध्यक्ष गोविन्द तामाङले बाढी, जनावरको जोखिमबाट वस्ती जोगाउन महानगरले वडालाई सहयोग गरेको बताउनुभयो । महानगरले बजेट बाँडफाडका सूचकहरुका आधारमा वडास्तरीय योजनाका लागि पहिलो वर्ष ९० लाख, दोस्रो वर्ष १ करोड १० लाख, तेस्रो वर्ष १ करोड १५ लाख, चौथो र पाँचौ वर्षमा समान १ करोड हाराहारीको बजेट वडातहमा पठाएको थियो ।विकासमा पछि परेका, अति महत्वपूर्ण योजना माग भै आएका वडाहरुलाई थप बजेट समेत व्यवस्था गरेको थियो । वडास्तरीय बजेट अपुग भएमा नगरस्तरीय योजनामार्फत वडाको विकासमा सघाउने नीति महानगरले लिएको थियो ।