सिमराका जनता ताराकाजीलाई मेयर बनाउन आतुर

माडी २४ बैशाख। माडी नगरपालिका वडा नं ३ सिमराका अधिकांश मतदाताहरुले हामीलाई दुःखमा साथ दिने ताराकाजीलाई मेयर बनाउन आतुर रहेको प्रतिक्रिया दिएका छन् ।

माडी नगरपालिका मेयर पदमा उम्मेद्वारी दिएर शनिबार सिमराका मतदाताहरुमाझ मत माग्न पुग्नुभएकी ताराकाजी महतोलाई मतदाताहरुले भने,” हामी हजुरलाई चाँडै माडी नगरपालिकाको मेयरमा निर्वाचित बनाउन आतुर छौं ।”

मतदाताहरुसँग भेटघाट गरी सिमराको बगैंचामा आयोजित कोणसभामा बोल्दै मेयर पदकी उम्मेदवार ताराकाजी महतोले माडीका समस्याहरुको बारेमा आफू जानकार रहेकोले मेयरमा निर्वाचित भएर माडीका समस्याहरु समाधान गर्नमा नै जीवन समर्पण गर्ने बताउनुभयो।

नेपाल कम्युनिष्ट पार्टी एमालेको तर्फबाट मेयरमा उम्मेदवारी दिएकी ताराकाजी महतोसमक्ष सिमराका बासिन्दाले सिमरामा जनावर ,नदी कटान र पुलको समस्या भएकोले तत्काल पहल गर्न आग्रह गरेका थिए।

चुनावी कोणसभामा नेकपा एमाले निर्वाचन परिचालन कमिटी माडीका संयोजक श्यामकुमार बिष्टले नेकपा एमालेको सरकारले नै देशमा विकासको लहर ल्याएको जनाउँदै समग्र माडीको विकासका लागि माडी नगरपालिकाको निर्वाचनमा नेकपा एमालेबाट उम्मेदवारी दिएका उम्मेदवारहरुलाई जिताउन मतदाताहरुलाई आग्रह गर्नुभयो।

नेकपा एमाले माडी नगरकमिटीका सचिव प्रसाद दवाडीले सञ्चालन गर्नुभएको कार्यक्रममा वडाध्यक्ष पदका उम्मेदवार मधुराम महतो,वडा सदस्यमकी उम्मेदवार मनीकुमारी महतोले अन्य पार्टीले कुनैपनि उम्मेदवार नदिएर सिमराका जनतालाई उपेक्षा गरेको बताउदै जनताका समस्या बुझेर समाधान गर्ने पार्टी नेकपा एमाले नै रहेको जानकारी दिनुभयो।

मेयरमा उम्मेदवार ताराकाजी महतोसहितको टोलीले माडी ३ को सिमरा ,रेवाटोल लगायतका स्थानहरुमा घरदैलो गर्नुका साथै चुनावी सभाहरु गरेको थियो।