बाढी-पहिरो प्रभावितका लागि ब्रान्डेड अटोमोबाइल्सको एक लाख एक हजार एक सय रुपैयाँ सहयोग

भरतपुर, १५ भदौ । बाढी–पहिरोबाट प्रभावित परिवारको राहत तथा उद्धारमा सहयोग पुर्‍याउने उद्देश्यले ब्रान्डेड अटोमोबाइल्स प्रा. लि. भरतपुरले प्रधानमन्त्री दैवी प्रकोप उद्धार कोषमा १ लाख १ हजार १ सय रुपैयाँ आर्थिक सहयोग गरेको छ।

देशका विभिन्न जिल्लामा आएको बाढी तथा पहिरोका कारण भएको मानवीय र भौतिक क्षतिप्रति दुःख व्यक्त गर्दै कम्पनीले विपद्को यस कठिन घडीमा पीडित परिवारलाई राहत पुग्ने विश्वासका साथ उक्त रकम सहयोग गरेको जनाएको हो।

चितवन र नवलपुर जिल्लाका लागि लागि एसएमएल इसुजु, डोङफेङ, कामा तथा फोर्थिङ फ्राइडे (SML Isuzu, Dongfeng, Kama तथा Forthing Friday) सवारीसाधनका आधिकारिक विक्रेताका रूपमा सेवा प्रदान गर्दै आएको ब्रान्डेड अटोमोबाइल्स प्रा.लि भरतपुर महानगरपालिका–९ मा रहेको छ।

प्राकृतिक विपद्बाट प्रभावित नागरिकको उद्धार, राहत तथा पुनःस्थापनाका लागि सबै क्षेत्रबाट सहयोग आवश्यक रहेको उल्लेख गर्दै सामाजिक उत्तरदायित्वअन्तर्गत प्रधानमन्त्री दैवी प्रकोप उद्धार कोषमा आर्थिक सहयोग उपलब्ध गराइएको कम्पनीका अध्यक्ष इन्द्र प्रसाद रेग्मीले बताउनुभयो ।

हालैको बाढी तथा पहिरोबाट रसुवा, धादिङ, नुवाकोट, गोरखा, चितवन, नवलपुरलगायतका विभिन्न जिल्लामा जनधनको ठूलो क्षति भएको भन्दै कम्पनीले प्रभावित परिवारप्रति गहिरो समवेदना व्यक्त गरेको छ। कम्पनीले विपद्मा परी ज्यान गुमाउनेहरूप्रति हार्दिक श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरेको छ। साथै, घाइते भएकाहरूको शीघ्र स्वास्थ्यलाभको कामना पनि गरेको छ।

बाढी–पहिरोका कारण घरबार गुमाएका तथा प्रभावित भएका परिवारलाई राहत उपलब्ध गराउन राज्यसँगै निजी क्षेत्र, संघसंस्था तथा सर्वसाधारणको समेत महत्वपूर्ण भूमिका रहने अध्यक्ष रेग्मीको भनाइ छ।

विपद्को अवस्थामा पीडित नागरिकलाई तत्काल राहत तथा आवश्यक सहयोग पुर्‍याउन प्रधानमन्त्री दैवी प्रकोप उद्धार कोषमार्फत संकलित रकम प्रयोग हुने भएकाले आफूहरूले उक्त कोषमा सहयोग गरेको उहाँले बताउनुभयो । ब्रान्डेड अटोमोबाइल्सले आगामी दिनमा पनि सामाजिक उत्तरदायित्वलाई प्राथमिकतामा राख्दै विपद् तथा अन्य कठिन परिस्थितिमा समुदाय र नागरिकको सहयोगका लागि आफ्नो भूमिका निर्वाह गर्दै जाने अध्यक्ष रेग्मी प्रतिबद्धता व्यक्त गर्नुभयो ।