पौडेललाई फकाउने प्रयास असफल, काठमाडौं फर्किए गृहमन्त्री खाँण र राज्यमन्त्री श्रेष्ठ

चितवन,१६ बैशाख– भरतपुर महानगरपालिकाको मेयरमा उम्मेदवारी दिएका नेपाली कांग्रेस नेता जगन्नाथ पौडेल आफ्नो अडानमा अडिक रहेका छन् । उनले महानगरको मेयरको उम्मेदवारीबाट पछि नहट्ने अडान कायमै राखेका हुन् ।

उनलाई फकाउन प्रधानमन्त्री एवं कांग्रेसका सभापति शेरबहादुर देउवाले गृहमन्त्री बालकृष्ण खाँण र राज्यमन्त्री उमेश श्रेष्ठलाई चितवन पठाएका थिए । गृहमन्त्री खाँण र राज्यमन्त्री श्रेष्ठले पौडेललाई उम्मेदवारी फिर्ता लिन आग्रह गरेका थिए ।

उनलाई फकाउन देउवाको दुत बनेर आएका गृहमन्त्री र राज्यमन्त्री पौडेल निवास नै धाएका थिए । तर पौडेलले पछि नहट्ने अडान छोडेनन् । अन्तत: पौडेलले उम्मेदवारी फिर्ता नलिने भएपछि । गृहमन्त्री खाँण र राज्यमन्त्री श्रेष्ठ काठमाडौं फर्किएका छन् ।

केन्द्रीय गठबन्धनले भरतपुरको मेयर नेकपा माओवादी केन्द्रलाई दिने निर्णय गरेपछि कांग्रेसका नेता कार्यकर्ता रुष्ट भएका थिए । असन्तुष्ट पक्षले कांग्रेसबाट भरतपुरको मेयरमा पौडेललाई उठाउने निर्णय गरेको थियो । जस अनुसार पौडेलले १२ गते मुख्य निर्वाचन अधिकृतको कार्यालयमा उम्मेदवारी दर्ता गराएका थिए