चितवनमा रेखा थापाको नेतृत्वमा राप्रपाको निर्वाचन लक्षित प्रचार अभियान सुरु

चितवन, २८ चैत । राष्ट्रिय प्रजातन्त्र पार्टी (राप्रपा) ले आजदेखि चितवनमा घरदैलो अभियान सुरु गरेको छ । स्थानीय तहको निर्वाचन लक्षित घरदैलो अभियानको औपचारिक सुरुवात गरिएको हो ।

राप्रपाले निर्वाचन केन्द्रीत घरदैलोका लागि चितवनमा रेखा थापालाई खटाएको छ । केन्द्रको निर्देशन अनुरुप थापाले चितवनमा अभियान सुरु गर्नुभएको छ । उहाँले पूर्वी चितवनको कालिका नगरपालिका र पश्चिम चितवनको भरतपुर महानगरपालिकाका विभिन्न वडामा आयोजित कार्यक्रममा सहभागी भएर राप्रपालाई बिजयी गराउन अपिल गर्नुभयो । । नेतृ थापाले राप्रपामा जनताको आकर्षण बढेको बताउनुभयो। कालिका नगरपालिकामा आयोजित कार्यक्रममा ५० बढि राप्रपा प्रवेश गरेको जनाईएको छ ।

कालिका र भरतपुरका विभिन्न वडा कार्यालयको उद्घाटन समेत गरिएको छ । राप्रपा भरतपुर महानगर सचिव सुलभ सिग्देलका अनुसार आजदेखि निर्वाचन केन्द्रित घरदैलोका कार्यक्रम निरन्तर जारी रहने छन् । राप्रपाले स्थानीय तहको निर्वाचन केन्द्रीत कार्यक्रम सञ्चालन गर्दा जनजागरणका लागि आफ्नो टोलमा पुगौं भन्ने नारा तय गरेको छ ।