रोकिएन कुसुमखोलाका चेपाङमाथि निकुञ्जको दादागिरी

माडी,२७ चैत्र।  माडी नगरपालिका वडा नं ९ कुसुमखोलाका चेपाङ समुदायलाई चितवन राष्ट्रिय निकुञ्जको सेनाले दुर्व्यवहार गरेका छन् ।

चैत १३ गते दिउँसो निकुञ्जको कर्मचारीसहित पुगेको सेनाको टोलीले कुसुमखोलाका १२ घर टहरामा आगो लगाएका थिए। आगो लागेकै घरमा पनि पुनः टहरा बनाएकोमा निकुञ्जले फेरि आएर भत्काएदिएको स्थानीयले बताए।

संविधान सभा सदस्य गोविन्दराम चेपाङका अनुसार आगो लगाइसकेपछि पनि चेपाङले त्यही ठाउँमा घर टहरो बनाएका थिए। तर, आइतबार साँझ पुगेको नेपाली सेनाको टोलीले फेरी घर भत्काउने र स्थानीयमाथि कुटपिट गरिएको उनले बताए।

विपन्न चेपाङ समुदायमाथि निकुञ्ज प्रशासनले पटकपटक दमन गर्ने क्रम नरोकिएको भन्दै नेपाल चेपाङ संघमार्फत सडक संघर्षको कार्यक्रममार्फत नै राज्यालाई दबाब दिने बेला आएको उनले बताए।

‘सीमान्तकृत चेपाङ समुदायमाथि राज्य पक्षबाटै दमम हुने क्रम रोकिएन,’ उनले भने, ‘अब हामी सडक संघर्ष गर्ने पक्षमा छौँ।’ आइतबार साँझ पनि निकुञ्जबाट आएका सेनाको टोलीले यहाँका स्थानीयमाथि कुटपिट गर्ने, धम्क्याउने गरेका उनले बताए।