मूल्यबृद्धि समायोजन नभए कन्स्ट्रक्सन होलिडे गर्ने निर्माण व्यवसायी संघ चितवनको चेतावनी

चितवन, ६ चैत । निर्माण व्यवसायीहरुले मूल्यबृद्धि समायोजन नभए कन्स्ट्रक्सन होलिडे गर्ने चेतावनी दिएका छन् । निर्माण व्यवसायी संघ चितवनले आज प्रमुख जिल्ला अधिकारीमार्फत् प्रधानमन्त्रीलाई ज्ञापनपत्र बुझाउँदै यस्तो चेतावनी दिएको हो ।

संघका जिल्ला अध्यक्ष केशवप्रसाद लामिछानेद्वारा हस्ताक्षरित ज्ञापनपत्रमा मूल्यबृद्धि समायोजन गर्न माग गरिएको छ । ज्ञापनपत्रमा भनिएको छ “मूल्यबृद्धि समायोजन उपलब्ध गराई तोकिएको समयमा निर्माण कार्य सम्पन्न गर्ने हाम्रो ईच्छालाई प्रभावकारी कार्यान्वयनका लागि माग गर्दछौं ।”

सरकार मार्फत् यस समस्याको सुक्ष्म विश्लेषण र अनुगमन गरी मूल्यबृद्धि नियन्त्रणका लागि समेत ठोस पहल गर्न माग गरिएको छ । आफ्ना मागहरु पूरा नभए कन्स्ट्रक्सन होलिडे गरी आन्दोलनका कार्यक्रमहरु गर्न बाध्य हुने चेतावनी दिईएको छ ।

कोभिडका कारण निर्माण कार्य गर्न जटिलता आईरहेको बेला मूल्य बृद्धि र सामान अभावले निर्माण कार्य गर्न कठिन भएको स्मरण गराईएको छ । फलामजन्य सामग्री सिमेन्ट, बिटुमिन, इन्धन, ईट्टा लगायत नदीजन्य निर्माण सामग्रीको मूल्यबृद्धिसँगै अभाव सिर्जना गरिएको व्यवसायीहरुले जनाएका छन् ।

संघका अध्यक्ष लामिछाने सहित संघका पदाधिकारी तथा सदस्यहरुको टोलीले आज प्रमुख जिल्ला अधिकारी आस्मान तामाङलाई ज्ञापनपत्र बुझाएको छ । ज्ञापनपत्र बुझ्दै प्रजिअ तामाङले व्यवसायीको माग जाजय रहेको र ज्ञापनपत्र सम्बन्धित निकायसम्म पु¥याउने बताउनुभयो ।