एमालेद्वारा माडीमा विद्युत अवरुद्ध भएको विषयमा ध्यानकर्षण

माडी (चितवन), ८ फागुन । नेपाल कम्युनिष्ट पार्टी (एमाले) नगर कमिटी, माडी, माडीमा विद्युत आपूर्ति अवरुद्ध भएको विषयमा आज आइतबार नेपाल विद्युत प्राधिकरण केन्द्रीय कार्यालय काठमाडौं र चनौली वितरण केन्द्रको ध्यानकर्षण गरेको छ । नगर कमिटीका अध्यक्ष नारायणप्रसाद अधिकारीको नेतृत्वको प्रतिनिधि मण्डलले चनौली वितरण केन्द्रमा पुगेर निमित्त प्रमुख इञ्जिनियर सरोज चौधरीमार्फत ध्यानकर्षण पत्र बुझाइको हो ।

नगर कमिटी अध्यक्ष अधिकारी र सचिव श्रीप्रसाद दवाडीद्वारा हस्ताक्षरित ध्यानकर्षण पत्रमा चनौली–माडी ३३ केभी विद्युत प्रशारण लाइन अन्तरर्गत कसर– बनकट्टा जङ्गल खण्डको भूमिगत लाइनमा पटक पटक भएको खराबीका कारण माडीबासीको जनजीवन असहज र कष्टप्रद भएको उल्लेख गरिएको छ ।

ध्यानकर्षण पत्रमा विद्युत आपूर्ति बन्द हुँदा माडी क्षेत्रका व्यवसायहरु प्रभावित हुनुको साथै टेलिफोन, इन्टरनेटमा आएको समस्याका कारण वित्तीय क्षेत्रमासमेत असर परेको हुनाले यशाशिघ्र वैकल्पिक व्यवस्था गरी समस्याको दीर्घकालिन समाधान लागि ध्यानकर्षण गरिएको छ । साथै समस्या समाधानको लागि केवल परिवर्तन गरी पुननिर्माण गर्नसमेत आग्रह गरिएको छ ।

ध्यानकर्षण पत्र बुझाउने प्रतिनिधि मण्डलमा नेकपा एमाले चितवनका उप सचिव चन्द्रकान्त न्यौपाने माडी नगर कमिटि सचिव श्रीप्रसाद दवाडी, नगर कमिटि सदस्य दिपक भण्डारीको सहभागिता रहेको थियो ।

नेपाल कम्युनिष्ट पार्टी (एमाले) नगर कमिटि, माडीले उपलब्ध गराएको ध्यानकर्षण पत्र बुझेर इञ्जिनियर सरोज चौधरीले तत्काल नेपाल विद्युत प्राधिकरण केन्द्रीय कार्यालयमा पठाउनुभयो । उहाँले माडीमा विद्युत आपूर्तिको समस्या समाधानको लागि केन्द्रीय कार्यालयसँग समन्वय गर्दै अगाडि बढ्ने प्रतिवद्धता जनाउनुभयो ।