बीजेपी नेतृ एवम् पूर्व मन्त्री सुष्मा स्वराजको निधन

नयाँ दिल्ली । भारतको राजनीतिमा लामो समय चर्चामा रहेकी महिला नेतृ, भारतीय जनता पार्टी (बीजेपी)का बरिष्ठ नेता सुष्मा स्वराजको मंगलबार राति निधन भएको छ । स्वराजको राति ११ बजेर १८ मिनेटमा हृदयघात (हर्ट अट्याक)का कारण नयाँ दिल्लीको एम्स अस्पतालमा ६७ वर्षको उमेरमा निधन भएको भारतीय सञ्चार माध्यमहरुले जनाएका छन् । सुष्मा स्वराज दिल्लीको पहिलो महिला मुख्यमन्त्री तथा भारतको पूर्व विदेशमन्त्री थिइन् ।

स्वराजको सन् २०१६ मा मृगौला प्रत्यारोपण गरिएको थियो । गम्भीर बिरामी रहेकै कारण धेरै आग्रहका बावजुद पनि उनी यसै साल भएको लोकसभा निर्वाचनमा उम्मेदवार भइनन् ।

स्वास्थ्यमा खराबी आएपछि स्वराजलाई मंगलबार बेलुकी ९ बजेर ५० मिनेटमा अस्पताल पुर्याइएको थियो । प्रधानमन्त्री नरेन्द्र मोदीले ट्वीटमार्फत बीजेपी नेत्री एवम् पूर्व विदेशमन्त्री स्वराजप्रति श्रद्धाञ्जलि व्यक्त गरेका छन् ।

नौ पटक साँसद बनिसकेकी सुष्मा स्वराज सर्वसाधारणबीच यति लोकप्रिय थिइन् कि ट्वीटमा उनका एक करोड २० लाख फलोअर्स थिए । उनी सन् १९७७ मा सबैभन्दा कम उमेरमा राज्यमन्त्री बनेकी थिइन । त्यस्तै उनी अटल बिहारी वाजपेयी नेतृत्वको एनडीए सरकारमा सूचना एवम् प्रशारण तथा स्वास्थ्य मन्त्री बनेकी थिइन् ।