टर्कीमा रुसी क्षेप्यास्त्र प्रतिरक्षा प्रणाली जडानको योजना, अमेरिकालाई भयो टाउको दुखाई

अङ्कारा, (रासस/एएफपी) । टर्कीका राष्ट्रपति रिसेप तायिप एर्डोगानले रुसी एस–४०० क्षेप्यास्त्र प्रतिरक्षा प्रणाली अर्को वर्ष सन् २०२०को अप्रिलदेखि जडान गरिने बताउनुभएको छ ।

संयुक्त राज्य अमेरिकाले रुसी हतियार खरिदप्रति विमती राख्दै अमेरिकाले टर्कीलाई अध्याधुनिक अमेरिकी लडाकू विमान एफ–३५ बिक्री नगर्ने जनाइसकेको छ ।

टर्कीको राजधानी अङ्कारामा राष्ट्रपतिको दल न्याय तथा विकास पार्टी (एकेपी)को भेलामा शुक्रबार सम्बोधन गर्दै राष्ट्रपति एर्डोगानले सन् २०२०को अप्रिलमा रुसी हतियार जडान प्रक्रिया आरम्भ हुने जानकारी दिनुभयो ।

रुसले उक्त क्षेप्यास्त्र प्रतिरक्षा प्रणाली यसै महिना टर्की पठाइसकेको छ । रुसी हतियार खरिद गरेको बिरोधमा अमेरिकाले बहुप्रतिक्षित एफ–३५ विमान बिक्री गर्ने योजना रद्द गरेको छ ।

अमेरिकाले आफ्ना लडाकू विमानमा प्रयोग गरेको अति संवेदनशील प्रविधि र सूचना चोरी हुने आशंका व्यक्त गरेको छ । राष्ट्रपति एर्डोगानले सम्बोधनका क्रममा अमेरिकी निर्णयप्रति लक्षित गर्दै भन्नुभयो, तपाइँहरु एफ–३५ दिनु हुन्न ? धेरै राम्रो तर यसबाट उत्पन्न हुनसक्ने संकट निवारण गर्ने उपाय हामीसँग पनि छ र हामी अरु देशलाई गुहार्न बाध्य हुनेछौं ।

उहाँले बोइङ कम्पनीको अर्बौं डलरको अर्डर रद्द गर्न आफूहरु पनि बाध्य हुने चेतावनी दिनुभयो । उहाँले गत महिना जापानमा सम्पन्न जी–२० सम्मेलनका क्रममा अमेरिकी राष्ट्रपति डोनाल्ड ट्रम्पसमक्ष आफूले यस विषयलाई गम्भीरतापूर्वक राखेको पनि बताउनुभयो ।

टर्की र संयुक्त राज्य अमेरिकाबीच यसै साता भएको बैठकमा उत्तरी सिरियामा मध्यवर्ती क्षेत्र निर्माण गर्ने विषयमा छलफल भएको थियो । बैठकमा टर्की र कुर्दिस फौजबीच थप लडाइँ रोक्ने बारेमा छलफल केन्द्रित भएको थियो ।