भरतपुर महानगरको न्यायीक समितिले गरेका निर्णय सदर

चितवन, ५ साउन । भरतपुर महानगरपालिकामा रहेको न्यायीक समितिले गरेका सबै निर्णयहरुलाई चितवन जिल्ला अदालतले सदर गरेको छ । गत आर्थिक वर्षमा अदालत गएका सबै निवेदन सदर भएको हो । न्यायीक समितिबाट ६ वटा निवेदन अदालत गएका थिए ।

महानगरपालिका न्यायीक समिति प्रमुख पार्वती शाह ठकुरीका अनुसार न्यायीक समितिले फैसला गरेका १६ वटा मुद्धा मध्ये ६ वटा चित्त नवुझेर अदालत गएका थिए । उहाँले भन्नुभयो “अदालत गएका मुद्धाहरुमा पनि हाम्रो निर्णय सदर भएको छ ।”महानगरको इजलासमा गत आर्थिक वर्षमा ३६ वटा मुद्धा दर्ता भएका थिए । अघिल्लो आर्थिक वर्षबाट जिम्मेवारी सरी आएका ८ वटा मुद्धा रहेका थिए ।

गत आर्थिक वर्षका लागि ४४ मुद्धा मध्ये यस आर्थिक वर्षलाई जिम्मेवारी सरेका २८ वटा रहेका छन् । जिम्मेवारी सरी आएका मुद्धा मध्ये ४ वटा मुद्धा यहि सातामा फैसला हुने तयारीमा रहेको उहाँले जानकारी दिनुभयो । न्यायका क्षेत्रमा महानगरको न्यायीक इजलास सक्षम रहेको भन्दै उहाँले कोरोना कहरका कारण भएको निषेधाज्ञाले यस वर्षमा अपेक्षाकृत मुद्धा फैसला गर्न नसकीएको बताउनुभयो । उहाँले भन्नुभयो “जनतालाई न्याय दिलाउने बिषयमा कुनै दुबिधा बिना काम गरेका छौ । जसका कारण अदालतले समेत न्यायीक समितिको निर्णयलाई हुवहु सदर गरेको छ ।”

महानगरको आन्तरिक मुल्याङ्कनमा पनि न्यायीक समिति सबै समितिहरु भन्दा अग्र स्थानमा रहेको उहाँको भनाई ।