चितवनमा साउन १ गतेदेखि कोरोना विरुद्धको खोप अभियान, ५५ वर्षमाथि, शिक्षक, प्राध्यापक, चालक सहचालकले पाउने

चितवन, ३१ असार । चितवनमा भोलि साउन १ गतेदेखि कोराना विरुद्धको खोप अभियान सञ्चालन हुने भएको छ । जिल्लाका सबै पालिकामा यो अभियान सञ्चालन हुन लागेको हो ।

स्वास्थ्य कार्यालय चितवनका अनुसार साउन १ र २ गते ५५ वर्ष माथिका सबैलाई यो खोप दिईने छ । नागरिकता वा अन्य परिचय खुल्ने सरकारी कागजात लिएर आउनेहरुलाई खोप उपलब्ध हुने छ । साउन ३ गते सरकारी, निजी र सामुदायिक विद्यालय तथा क्याम्पसका प्राध्यापक, शिक्षकलाई खोप लगाईने छ । सम्बन्धित पालिकाको शिक्षा शाखाबाट प्रमाणित गरेको प्रतिलिपि र कार्ड अनिबार्य गरिएको कार्यालयका प्रमुख दिपकप्रसाद तिवारीले बताउनुभयो ।

यसैगरी यस अघिनै तोकिएको तर खोप लगाउन छुटेका स्वास्थ्यकर्मी, कर्मचारी, पत्रकार, बैक कर्मचारी, सुरक्षाकर्मी, संंस्थान कर्मचारी, जनप्रतिनिधि सबैले यो खोप लगाउन पाउने छन् । परिचय र प्रमाण खुल्ने कागजात लिएर सम्बन्धित खोप केन्द्रबाट खोप लगाउने व्यवस्था गरिएको उहाँले जानकारी दिनुभयो ।

यस्तै खोप अनिवार्य गरेका देशमा जानु पर्ने व्यक्तिहरुले पासपोर्टमा भिसा लागेको प्रमाणसहित आएमा उनीहरुलाई पनि यो खोप दिईने तिवारीले बताउनुभयो । सार्वजनिक सवारीका चालक र सहचालकलाई लाईसेन्स र सम्बन्धित निकायबाट प्रमाणसहित आएमा खोप लगाउने व्यवस्था गरिएको छ ।

तोकिएका समूहबाहेक अन्यलाई यो खोप दिन नमिल्ने बताउँदै तिवारीले भन्नुभयो “तोकिएका समूहबाहेक अरुलाई खोप दिन मिल्दैन । यस अघि कोभिडशिल्ड पहिलो डोज लगाएकाहरुलाई पनि यो खोप लगाउन मिल्दैन ।” खोप सम्बन्धी केही समस्या भएमा सम्बन्धित वार्डको स्वास्थ्य संस्थाबाट जानकारी लिन सकिने कार्यालयले जनाएको छ । (कान्तिपुर हेल्थबाट)