चितवनका अस्पतालमा २२० संक्रमित उपचाररत, दुईको मृत्यु

भरतपुर, १६ असार । चितवनका विभिन्न अस्पतालहरुमा गरी बुधबार २२० जना संक्रमित उपचाररत छन् । उपचारका क्रममा पछिल्लो २४ घण्टामा २ जनाको मृत्यु भएको छ । मृत्यु हुनेमा लमजुङ र कास्कीका एक/एक जना हुन् ।

स्वास्थ्य कार्यालय चितवनका अनुसार भेन्टिलेटर चाहिने १७ संक्रमितसहित आइसियूमा ९० जना, एचडियूमा २८ जना र सामान्य आइसोलेसन बेडमा १०२ संक्रमित उपचाररत छन् । पछिल्लो २४ घण्टामा अस्पतालबाट ३४ संक्रमित डिस्चार्ज भएका छन् ।

उपचाररत २२० संक्रमितमध्ये भरतपुर अस्पतालमा ७० जना, चितवन मेडिकल कलेजमा ६५ जना, पुरानो मेडिकल कलेजमा १२ जना र क्यान्सर अस्पतालमा ९ जना छन् । अन्य साना अस्पताल र स्थानीय तहले बनाएका आइसोलेसनमा ६४ जना छन् ।