सभापति श्रेष्ठले जन्मदिन रक्तदान गरी मनाउँदै

चितवन ९ असार । जिल्लामा पछिल्लो समयमा आफ्नो जन्मदिनको अबसरमा रक्तदान गर्ने प्रचलन वढ्दै गएको छ । यसै क्रममा नेपाली काङ्ग्रेस चितवनका सभापति जीतनारायण श्रेष्ठले आज आफ्नो ४२ औं जन्मदिनको अवसरमा उहाँले रक्तदान गर्नु भएको हो । ५० औं पटक रक्तदान गर्नुभएका श्रेष्ठले जन्मदिनको अवसरमा केही नयाँ सोचका साथ काम गर्नु पर्ने भन्दै रक्तदान गर्दै आएको बताउनुभयो ।
बिद्यार्थी राजनीति संगै जन्मदिनमा रक्तदान गर्दै आउनु भएका श्रेष्ठले रक्तदान गर्दा रगत लाने बिरामीलाई सहयोग पुगोस भन्ने उद्धेश्यले बिरामीको आफन्तले तिर्दै आएको रु ८ सय ५० पनि आँफैले तिर्नु भएको छ । रक्तदान गर्दा बिरामीको आफन्तले तिर्नु पर्ने रगतको पौसा समेत नियमित रुपमा तिर्ने उहाँले घोषणा गर्नु भयो । उहाँले भन्नुभयो “रगतको अभावले कोही मर्नु नपरोस भनेर सबैले आफ्नो वर्षदिनमा रक्तदान गर्ने र बिरामीले रगतको पैसा तिर्नु नपरोस भनेर सो को पनि रक्तदातालेनै तिर्न आव्हान गर्दछु ।”
पछिल्ला दिनमा जन्मदिनको अवसरमा रक्तदान गर्ने प्रचलन वढ्दै गएको क्षत्रीय रक्तसञ्चार केन्द्र भरतपुरका प्रमुख रमेशकान्त पौडेलले वताउनुभयो । अहिले सम्म कतिले जन्मदिनको अवसरमा रक्तदान गरे भन्ने वास्तबिक तथ्याङ्क नभए पनि युवा बिद्यार्थीहरुले आफ्नो जन्मदिनको अवसरमा रक्तदान गर्दै आएको उहाँको भनाई छ । जिल्लामा अहिले गतको माग वढ्दै गएको छ । अहिले दैनिक ८० युनिट रगतको माग भए पनि केन्द्रले ५० युनिट मात्र उपलव्ध गराउन सकेको उहाँले जानकारी दिनुभयो ।
आबश्यक अन्य रगत भने बिरामीका आफन्त र स्वयम सेवी रक्तदाताबाट पुर्याउँदै आएको उहाँले जानकारी दिनुभयो ।