कोभिड संक्रमण नियन्त्रण र व्यवस्थापनमा लाग्न पार्टी पंक्तिलाई एमाले चितवनको निर्देशन
तपाईको प्रतिक्रिया
चितवन, ३१ जेठ । नेपाल कम्युनिष्ट पार्टी (एमाले) चितवनले कोभिड–१९ संक्रमण नियन्त्रण तथा व्यवस्थापनमा लाग्न सम्पूर्ण पार्टी पंक्तिलाई निर्देशन दिएको छ । नेकपा एमाले महाधिवेशन आयोजक कमिटी चितवनको आज सोमबार भर्चुअल बैंठकले स्वास्थ्य सुरक्षाका मापदण्ड कडाईका साथ पालना गर्न आम नागरिकलाई अपिल समेत गरेको छ ।
जिल्लाभित्र हाल कोभिड १९ को उपचारको प्रभावकारिता अनुगमन गर्न सम्बन्धित निकायको ध्यानाकर्णण गराउँदै बैठकले सुरक्षित रुपमा कोभिड १९ नियन्त्रणमा सक्रिय रहन स्थानीय पार्टी पंक्तिलाई निर्देशन दिएको छ ।
बैठकले मनसुनको सुरुआतसँगै हुनसक्ने प्राकृतिक प्रकोप र विपद् न्यूनिकरणका लागि पूर्व तयारी गर्न जिल्लास्थित प्रकोप व्यवस्थापन समितिको ध्यानाकर्षण गराएको छ । मनसुनको समय सुरु भएको र यस वर्षको मनसुनमा अघिल्ला वर्षहरुमाभन्दा भारी वर्षा हुनसक्ने भन्दै मौसमविद्हरुले प्रक्षेपण गरेकोले संभावित जोखिम न्यूनिकरणको लागि पूर्वतयारीमा जुट्न ध्यानाकर्षण गराएको हो ।
बैठकबारे जानकारी दिँदै जिल्ला अध्यक्ष पार्वती रावलले न्यूजभित्तोलाई भन्नुभयो “वर्षात्ले ल्याउन सक्ने जोखिम घटाउन हामीले जिल्ला स्थित प्रकोप व्यवस्थापन संयन्त्रलाई चुस्त रहन आग्रह गर्ने निर्णय गरेका छौं । अध्यक्ष रावलले नदी तटीय क्षेत्रमा बसोबास गर्ने स्थानीयलाई पनि सचेत रहन आग्रह गर्नुभएको छ ।
बैठकले कोभिड १९ महामारीमा जिल्ला स्थित कोभिड उपचारका क्रममा निजी अस्पतालहरुले चर्को शुल्क लिँदै आएको गुनासाहरु पनि आइरहेकोले त्यस्ता अस्पतालाहरुलाई चर्को शुल्क नलिन समेत आग्रह गर्ने निर्णय गरेको छ ।
नेकपा एमालेका बागमती प्रदेश सहइन्चार्ज काशीनाथ अधिकारी, प्रदेश अध्यक्ष आनन्द पोखरेल, एमाले नेता कृष्णभक्त पोखरेल लगायतले पार्टी संगठन विस्तारमा राख्न कार्यकतर्नाहरुलाई निर्देशन दिनुभयो ।
बैठकले पार्टीको सांगठनिक क्रियाकलाप गतिशिल बनाउन तथा सदस्यता नविकरण, वितरणको काम चुस्त बनाउन समेत सांठनिक जिम्मेवारीमा रहेका कार्यकर्तालाई निर्देशन दिएको अध्यक्ष रावलले जानकारी दिनुभयो ।
उहाँका अनुसार यही असार २५ गतेसम्म आआफ्नो वडा कमिटीका अध्यक्ष, सचिव वा ईन्चार्जसँग समन्वय गरी पार्टी सदस्यता नविकरण गरी सक्ने बैठकले निर्णय गरेको छ । स्थानीय सरकारले प्रस्तुत गर्ने नीति, कार्यक्रम र बजेट जनपक्षीय, समन्वयायिक विकास गर्ने खालको ल्याउन बैठकले निर्देशन दिएको छ ।