टी–ट्वान्टी श्रृङ्खलाको पहिलो खेलमा नेपालले मलेसियालाई सात विकेटले हरायो

काठमाडौँ । कप्तान पारस खड्काको अविजित ८६ रनको मद्दतले नेपाल मलेसियासँगको दुई टी–ट्वान्टी श्रृङ्खलाको पहिलो खेलमा विजयी भएको छ । ५० बलको सामना गरेका पारसले ८ चौका र ५ छक्का प्रहार गरे ।

घरेलु किनरारा ओभल क्रिकेट मैदानमा टस जितेर पहिले ब्याटिङ गरेको मलेसियाले १२८ रनको लक्ष्य दिएको थियो । नेपालले ९ बल बाँकी छँदै ७ विकेटले विजयी भएको हो ।

नेपालका लागि पाँचौ नम्वरमा ब्याटिङमा गएका शरद भेषवाकरले पारसलाई उत्कृष्ट साथ दिनुकासाथै १६ रन बनाए । ओपनर प्रदीप ऐरीले ८, ज्ञानेन्द्र मल्लले ७ र रोहित कुमार पौडेलले ५ रन बनाए । नेपालका लागि करन केसीले ३, सन्दीप लामिछाने र बसन्त रेग्मीले २/२ र सोमपाल कामीले एक विकेट लिए ।

मलेसियाका लागि भिरनदीप सिंहले ५७ रन, कप्तान अहमेद फेजले ४५ रन र फित्रि सामले १२ रन बनाए । अन्य व्याट्सम्यानले दोहोरो अंक जोड्न सकेनन् । मलेसियाका पाँच जना व्याट्सम्यान खाता नखोल्दै आउट भएका थिए । मलेसियाका लागि अनवर रहमानले २ र फित्रि समले एक विकेट लिए । सिंगापुरमा हुने टी–ट्वान्टी विश्वकपको एशिया क्षेत्रीय फाइनल छनौटको लागि मलेसिया पुगेको नेपाली टोलीले दोस्रो खेलपनि भोलि सोही मैदानमा खेल्नेछ ।