लुम्बिनी प्रदेश : एकमतले विपक्षीको सामना गर्ने एमालेको निर्णय

रुपन्देही,१९ जेठ । नेकपा एमाले लुम्बिनी संसदीय दलको बैठकले सरकारका नीति तथा कार्यक्रम र बजेटमा सबै सांसदहरु एकसाथ एकढिक्का भएर जाने निर्णय गरेको छ । आज दिउँसो १ बजे शुरु हुने प्रदेशसभाको आठौं तथा बजेट अधिवेशन अगाडि दलको धारणा बनाउन बैठक बसेको प्रमुख सचेतक भूमिश्वर ढकालले बताए ।

मुख्यमन्त्री शंकर पोखरेलको अध्यक्षतामा बसेको बैठकमा प्रदेशसभामा सरकारविरुद्ध हुने असंवैधानिक क्रियाकलापका विरुद्धमा सबै सांसदहरु एकसाथ उभिने निर्णय भएको ढकालले बताए ।

अधिवेशनको पहिलो दिनको कार्यसूचीमा प्रदेश प्रमुख कार्यालयबाट आएका पत्रबारे जानकारी दिने र दलका प्रमुखहरुले औपचारिकरुपमा शुभकामना दिने कार्यसूचि कार्यव्यवस्था परामर्श समितिको बैठकले तय गरेको छ ।

तर विपक्षी गठबन्धन दलका नेताहरुले सभामुख पूर्णबहादुर घर्तीलाई अविश्वासको प्रस्ताव पेश गर्न लगाउने आशंकाका समाचार बाहिरिएपछि सत्तारुढ एमालेले यसको प्रतिवाद गर्ने निर्णय गरेको हो ।

प्रमुख सचेतक ढकालले कानुन विपरीत दर्ता भएको अविश्वासको प्रस्तावका विषय अगाडि सारिए तत्काल बहिस्कार गर्ने र सरकारलाई अध्यादेशबाट नीति तथा कार्यक्रम र बजेट ल्याउन सिफारिस गर्ने बताए । उनका अनुसार प्रतिपक्षीले बाध्य बनाएर संसद अन्त्य गर्ने वातावरण नआओस् भन्ने आफूहरुले चाहेको बताए ।