चितवन राष्ट्रिय निकुञ्जद्वारा २४ जना पक्राउ, बोलेरो जीप र दुई स्कूटर बरामद

चितवन, १० जेठ । चितवन राष्ट्रिय निकुञ्जले२४ जनालाई पक्राउ गरेको छ । नारायणी नदीमा प्रतिबन्धित तियारी जालको प्रयोग गर्दै माछा मारिरहेको समयमा उनीहरुलाई पक्राउ गरिएको हो ।

निकुञ्जका सूचना अधिकारी लोकेन्द्र अधिकारीले न्यूजभित्तोलाई दिनुभएको जानकारी अनुसार आज सोमबार बिहान ३ बजेको समयमा भरतपुर महानगरपालिका वडा नं. २६ भगेडी स्थित नारायणी नदी किनारबाट उनीहरुलाई पक्राउ गरिएको हो । उनीहरुको साथबाट एउटा बोलेरो जीप, दुई वटा स्कूटर, दुई क्विन्टल माछा र ४४ थान तियारी जाल बरामद गरिएको छ । उनीहरुलाई राष्ट्रिय निकुञ्ज तथा वन्यजन्तु संरक्षण ऐन २०२९ बमोजिम मुद्दा लगाई कानुनी कारवाही गरिने निकुञ्जले जनाएको छ ।

निकुञ्ज आसपासका नदी तथा खोलाहरुमा अनुमति प्राप्त व्यक्तिहरुले मात्रै तोकिएका औजार प्रयोग गरेर माछा मार्न पाउने व्यवस्था रहेको छ । तिवारी जाल प्रयोग गर्न निषेध छ । निषेधित जालको प्रयोग गरी अनुमति नलिएका व्यक्तिहरुबाट माछा मार्नु गैरकानुनी कार्य भएको निकुञ्जले जनाएको छ ।