चितवनमा उत्पादित ‘अबि फ्रेस’ को शिलबन्दी पानीमा लामखुट्टे (भिडियो सहित)

चितवन, १४ वैशाख । ईच्छाकामना इण्डण्ट्रिज प्रा.लि.ले उत्पादन गरेको अबि फ्रेस (ABI Fresh) प्रशोधित पानीमा लामखुट्टे भेटिएको छ । भरतपुरको गौरीगञ्जमा रहेको उक्त कारखानाबाट उत्पादित पानीमा मृत अवस्थामा रहेको लामखुट्टे भेटिएको हो ।

(हेर्नुहोस् शिलबन्दी पानीमा देखिएको लामखुट्टे)

बजारमा सर्वसाधारणले ‘शुद्ध पानी’ सम्झेर मिनिरल वाटरको रुपमा प्रयोग गर्ने पानीमा अति गैरजिम्मेवारीपूर्ण तरिकाले फोहोर वस्तु फेला पार्नुलाई मानव स्वास्थ्यमाथिको गम्भीर लापरवाहीका रुपमा लिईएको छ । भरतपुरको एक जिम हलमा पिउनका लागि लिईएको उक्त शिलबन्दी बोतलमा कालो वस्तु देखिएपछि हेर्दा प्रष्ट रुपमा लामखुट्टे देखिन्छ । उपभोग्य मिति पनि नसकिएको शिलबन्दी पानीमा लामखुट्टे भेटिनुलाई कम्पनीको गैरजिम्मेवारीपूर्ण कार्यकाका रुपमा लिईएको छ ।

उक्त घटनापछि न्यूजभित्ताका प्रतिनिधि उक्त कारखाना पुग्दा उत्पादन स्थल पनि अति नै फोहोर रहेको थियो । पानी प्रशोधनमा खटिने व्यक्तिहरुले माक्स लगायतका सुरक्षा उपकरण लगाएको पाईदैनथ्यो ।

(हेर्नुहोस् उक्त पानी उत्पादन गर्ने कारखाना)

उक्त कम्पनीका सञ्चालक प्रकाश अधिकारीले आफूहरुले जानजान त्यस्तो नगरेको प्रतिक्रिया दिनुभयो । उहाँले भन्नुभयो “कहाँ गल्ती भयो मैले सोचिरहेको छु ।”

खाद्य प्रबिधि तथा गुण नियन्त्रण डिभिजन कार्यालय, भरतपुरका प्रमुख घननाथ अधिकारीले शिलबन्द पानीमा फोहोर भेटिएमा परीक्षणका लागि पठाउने र परीक्षणमा अशुद्ध भेटिएमा कानुनी प्रक्रियामा जाने बताउनुभयो । उहाँले भन्नुभयो “आँखाले देख्न सक्ने फोहोर भनेपछि परीक्षणमा शुद्ध आउने कुरै भएन ।” उहाँले प्रमाणित भएमा ५० हजार रुपैयाँसम्म जरिवाना र पाँच वर्षसम्म कैद सजायँ हुन सक्ने कानुनी व्यवस्था रहेको जानकारी दिनुभयो ।