रेडियो त्रिवेणीको क्यालेण्डर लोकार्पण

भरतपुर, ११ वैशाख । रेडियो त्रिवेणी १००.६ मेगाहर्जले नव वर्ष २०७८ सालको क्यालेण्डर लोकापर्ण गरेको छ । आज शनिबार लोकतन्त्र दिवसको अवसर पारेर क्यालेण्डर लोकार्पण गरिएको हो ।

सो अवसरमा प्रमुख अतिथि नेपाल पत्रकार महासंघ चितवनका अध्यक्ष नारायण अधिकारीले संचारको माध्यमद्वारा रेडियो त्रिवेणीले समाज रुपान्तरणमा खेलेको भूमिकाको उच्च प्रसंशा गर्नुभयो । उहाँले आफ्नो कार्यकालमा जिल्लाका मिडिया हाउसहरु दिगो रुपमा स्थापित गराउन महत्वपूर्ण भूमिका खेल्ने बताउनुभयो ।

कार्यक्रममा रेडियोका अध्यक्ष तेजनारायण खरेलले रेडियो क्षेत्रका लामो अनुभवी व्यक्तिलाई महासंघ जिल्ला शाखाले अध्यक्षको रुपमा पाएकाले चितवनका रेडियो र त्यसमा कार्यरत संचारकर्मीहरुलाई लाभ हुने कुरामा आफु विश्वस्त रहेको बताउनुभयो ।

रेडियोका समाचार प्रमुख हेमराज रिमालले सहजीकरण गर्नुभएको कार्यक्रममा स्टेसन म्यानेजर मुकुन्द भुसालले स्वागत मन्तव्य राख्नुभएको थियो । कार्यक्रममा निर्देशकद्धय प्रकाश पौडेल र अर्जुन अधिकारी, साहित्यकार राधा कोईराला, शिक्षा प्रेमी नहेन्द्र खड्का, रेडियोका वरिष्ठ कार्यक्रम प्रस्तोता सिर्जन अविरल लगायतले बोल्नु भएको थियो ।

सोहि कार्यक्रममा पत्रकार महासंघ चितवनका नव निर्वाचित अध्यक्ष नारायण प्रसाद अधिकारीलाई स्वागत तथा सम्मान समेत गरिएको थियो ।