ओलीलाई सहयोग गर्न कांग्रेसलाई नैतिकताले दिंदै ः कांग्रेस बरिष्ठ नेता पौडेल

चितवनन, २० फागुन । नेपाली काङ्ग्रेसका वरिष्ठ नेता रामचन्द्र पौडेलले प्रधानमन्त्री केपी ओलीलाई सरकार चलाउन सहयोग गर्न कांग्रेसलाई नैतिकताले नदिने बताउनु भएको छ । नेपाल प्रेस युनियन चितवनले आज बिहीबार भरतपुरमा आयोजना गरेको पत्रकार सम्मेलनमा बोल्दै उहाँले ओली बाहेकलाई सहयोग गर्न सक्ने बताउनुभएको हो ।
उहाँले भन्नुभयो “ओलीले देशलाई जुन जोखिममा पार्नुभयो, व्यवस्था र संबिधानलाई जोखिममा पार्ने व्यक्तिलाई अहिले काङ्ग्रेसले सहयोग गर्न नैतिकताले दिंदैन ।” नेता पौडेलले सरकारमा प्रचण्ड–नेपाल समूहलाई सहयोग गर्न सकिने बताउनुभयो । उहाँले काङ्ग्रेसले अरुलाई सहयोग गरेर पनि देशलाई संकटबाट पार लगाउन सक्ने बताउँदै भन्नुभयो “कांग्रेसले आफ्नो हैसियतमा रहेर अरुलाई सरकार चलाउन सहयोग गर्न सक्छ, त्यसमा कांग्रेसको भूमिका अझ महत्वपूर्ण हुन्छ ।” उहाँले थप्नुभयो “ यसबारेमा पोजिटिभ हुन सकिन्छ, त्यस सम्बन्धमा छलफल हुन्छ ।”
प्रधानमन्त्री बन्न कांग्रेस सभापति शेरवहादुर देउवलाई सजिलो नभएको भन्दै उहाँले प्रधानमन्त्री हुनबाट रोक्न खोजेको नभई लोकतन्त्र र प्रणालीलाई के गर्दा राम्रो हुन्छ छलफल गरेर निश्कर्ष निकाल्नुपर्ने उहाँको भनाई थियो । उहाँले भन्नुभयो “अहिलेको स्थिति नाजुक छ, संकटबाट देशलाई पार लगाउने जिम्मेवारी कसले लिने रु कांग्रेस बाहेक अरुले भूमिका खेल्न सक्ने हैसियत देखेको छैन ।”
पौडेलले भन्नुभयो “सरकारमा जाने, किन जाने, कसरी जाने, के रुपमा जाने भन्ने कुराहरु छलफल गर्छौ ।” भद्रगोलको अहिलेको राजनीति काङ्ग्रेसले सम्हाल्नु पर्ने उहाँको भनाई थियो । पत्रकारको एक प्रश्नमा उहाँले भारत, चीन र अमेरीकालाई कम्फरटेवल होइन नेपालको सिस्टमलाई कम्फरटेवल हुने गरी सरकार बन्नुपर्ने बताउनुभयो ।
आफुले प्रधानमन्त्री र राष्ट्रपति हुनका लागि प्रस्ताब आउँदा अस्विकार गरेको दावी गर्दै उहाँले व्यवस्था प्रभाबित गर्ने गरी आफुलाई कुनै पद नचाहिएको बताउनुभयो । अहिलेकै अवस्थाको राष्ट्रपति पद भने आफुलाई कहिल्यै नचाहिने बताउनुभयो । आफु क्रियाशील भूमिकामा बाँचुन्जेल रहने पौडेलको भनाई थियो ।