नेपाल बाल संगठन चितवनमा पौडेलको नेतृत्वमा नयाँ समिति

चितवन, फागुन १५ । नेपाल बाल संगठन चितवनको जिल्ला भेला तथा सातौं अधिवेशनले रविकिरण पौडेलको अध्यक्षतामा नयाँ कार्यसमिति चयन गरेको छ ।आज शनिबार भरतपुरमा सम्पन्न अधिवेशनले सर्वसम्मत रुपमा समिति चयन गरेको हो ।

अधिवेशनले समितिको सदस्यमा हेमा पौडेल, मुकुन्दप्रसाद विडारी, हरिकृष्ण शर्मा चापागाईं, रामबाबु श्रेष्ठ, गुरुचन्द्र घिमिरे, प्रतिमा सिलवाल र अमृता भट्टराईलाई चयन गरेको छ । ११ सदस्यीय समितिमा बाँकी दुई जना कार्यसमिति र एक जना केन्द्रीय समितिले मनोनयन गर्ने व्यवस्था रहेको छ ।

निर्वाचित समितिका पदाधिकारीलाई नेपाल बाल संगठन केन्द्रीय समितिका अध्यक्ष विद्या न्यौपानेले पद तथा गोपनियताको सपथ ग्रहण गराउनु भएको थियो । चार वर्षीय कार्यकालको लागि निर्वाचित समितिका सभापति रविकिरण पौडेलले चितवनको बाल संगठनले बालबालिकाको क्षेत्रमा परिवर्तन ल्याउने गरी काम गर्ने प्रतिबद्धता व्यक्त गर्नुभयो ।