चितवनका भिष्म अधिकारी निर्माण व्यवसायी महासंघको केन्द्रीय सदस्यमा मनोनित

चितवन, २३ कात्तिक । चितवनका निर्माण व्यवसायी भिष्म अधिकारी नेपाल निर्माण व्यवसायी महासंघको विशेष आमन्त्रित सदस्यमा मनोनित हुनुभएको छ । नेपाल निर्माण व्यवसायी महासंघले महासंघको विधानको परिच्छेद–७ को दफा २५ (झ) बमोजिम अधिकारीलाई महासंघको कार्यसमितिको विशेष आमन्त्रित सदस्य पदमा मनोनित गरेको हो ।

महासंघका अध्यक्ष निकोलस पाण्डेले मनोनयनसम्बन्धी पत्र अधिकारीलाई हस्तान्तरण गर्नुभएको छ । चितवनको निर्माण व्यवसाय क्षेत्रमा लामो समयदेखि सक्रिय अधिकारीले यसअघि निर्माण व्यवसायी संघ चितवनको कार्यसमिति सदस्यका रूपमा एक कार्यकाल काम गरिसक्नुभएको छ । त्यसैगरी, उहाँले संघको महासचिवको जिम्मेवारीसमेत एक कार्यकाल सफलतापूर्वक निर्वाह गर्नुभएको थियो ।

स्थानीय तहबाट निर्माण व्यवसायीको संस्थागत नेतृत्वमा अनुभव हासिल गर्नुभएका अधिकारीको महासंघको केन्द्रीय तहमा भएको मनोनयनलाई चितवनको निर्माण व्यवसाय क्षेत्रका लागि महत्वपूर्ण उपलब्धिका रूपमा हेरिएको छ । जिल्ला तहमा रहेर निर्माण व्यवसायीका हकहित, व्यावसायिक समस्या तथा संस्थागत गतिविधिमा आफूले काम गरेको बताउँदै उहाँले अब केन्द्रीय तहमा रहेर व्यवसायीका साझा सवाल उठाउने अवसर प्राप्त भएको बताउनुभयो ।

महासंघका संस्थाका गतिविधि तथा कार्यक्रमलाई प्रभावकारी रूपमा सञ्चालन गर्न सक्रिय सहभागिता हुने उहाँले बताउनुभयो । मनोनयन पत्रमा महासंघको प्रतिष्ठा अभिवृद्धि तथा संस्थागत गतिविधिमा उहाँको सक्रिय सहभागिताको अपेक्षासहित सफल कार्यकालको शुभकामना व्यक्त गरिएको छ ।

चितवनबाट निर्माण व्यवसायीको नेतृत्व गर्दै महासंघको केन्द्रीय संरचनामा पुग्नुभएका अधिकारीको मनोनयनले जिल्लाका निर्माण व्यवसायीमा उत्साह थपेको छ ।

अधिकारी भरतपुरस्थित सेभ इञ्जिनियरिङ्ग कन्स्ट्रक्सन प्रा.लि.का सञ्चालक हुनुहुन्छ ।