कृषि विश्वविद्यालयको स्थगित भर्ना कार्यक्रम असोज १५ र १६ गते हुने

चितवन, ११ असोज । प्रतिकूल मौसमका कारण स्थगित गरिएको कृषि तथा वन विज्ञान विश्वविद्यालयको स्नातक तहको नयाँ विद्यार्थी भर्ना कार्यक्रम असोज १५ र १६ गते सञ्चालन हुने भएको छ। विश्वविद्यालयले यसअघि असोज ९ र १२ गतेका लागि तय गरेको भर्ना कार्यक्रम नयाँ मिति तोकेर सञ्चालन गर्ने निर्णय गरेको हो।

विश्वविद्यालयको एकीकृत प्रवेश परीक्षा तथा भर्ना समिति २०८३ को आकस्मिक बैठकले असोज ९ र १२ गते तय भएको भर्ना कार्यक्रम असोज १५ र १६ गते गर्ने निर्णय गरेको हो।

विश्वविद्यालयले असोज ८ गते जारी गरेको सूचनामार्फत परिवर्तित मितिबारे जानकारी गराएको छ। सूचनाअनुसार स्थगित भएका एकीकृत प्रवेश परीक्षा तथा भर्ना कार्यक्रम पूर्वनिर्धारित स्थान तथा निर्धारित प्रक्रियाअनुसार नै सञ्चालन हुनेछन्।

हाल जारी मौसमसम्बन्धी चेतावनी तथा नेपाल सरकार र जिल्ला प्रशासन कार्यालयबाट जारी गरिएका सूचनालाई मध्यनजर गर्दै विश्वविद्यालयले भर्ना कार्यक्रम स्थगित गरेको थियो। प्रतिकूल मौसमका कारण हुन सक्ने सम्भावित जोखिमलाई ध्यानमा राखेर विद्यार्थी, अभिभावक तथा अन्य सरोकारवालाको सुरक्षाका लागि कार्यक्रम स्थगित गर्नुपरेको विश्वविद्यालयले जनाएको छ।

मौसमको प्रतिकूलताका कारण भर्ना कार्यक्रम अचानक स्थगित हुँदा विद्यार्थी तथा अभिभावकलाई असुविधा भएको विश्वविद्यालयले जनाएको छ । भर्ना कार्यक्रम स्थगित गर्नुपरेको परिस्थितिप्रति विश्वविद्यालयले सम्बन्धित सबैसँग क्षमासमेत मागेको छ।

नयाँ मितिअनुसार भर्ना प्रक्रियामा सहभागी हुनुपर्ने विद्यार्थीलाई असोज १५ र १६ गतेको संशोधित तालिकाअनुसार उपस्थित हुन विश्वविद्यालयले आग्रह गरेको छ। साथै, भर्नासम्बन्धी थप जानकारीका लागि विश्वविद्यालयको आधिकारिक सूचनालाई आधार मान्न पनि सम्बन्धित सबैलाई अनुरोध गरिएको छ।