अर्थ र सञ्चार तथा सूचना प्रविधि मन्त्रीमा पुनः डा. युवराज खतिवडा नियुक्त

काठमाडौं । अर्थ र सञ्चार तथा सूचना प्रविधि मन्त्रीमा पुनः डा युवराज खतिवडा नियुक्त हुनुभएको छ । प्रधानमन्त्री केपी शर्मा ओलीको सिफारिशमा राष्ट्रपति विद्यादेवी भण्डारीले डा. खतिवडालाई अर्थमन्त्री नियुक्त गर्नुभएको हो ।

आज मिर्गौला प्रत्यारोपणका लागि शल्यक्रिया कक्षमा जानुअघि प्रधानमन्त्री ओलीले खतिवडालाई अर्थमन्त्रीमा पुनः नियुक्त गर्न राष्ट्रपतिलाई सिफारिस गर्नुभएको थियो ।

संविधानको धारा ७८ को उपधारा (१) बमोजिम प्रधानमन्त्रीको सिफारिसमा डा. युवराज खतिवडालाई मन्त्री पदमा नियुक्त गरिएको राष्ट्रपति कार्यालयबाट जारी विज्ञप्तिमा जनाइएको छ ।

प्रधानमन्त्री ओलीले सम्हाली आउनु भएको अर्थ र सञ्चार तथा सूचना प्रविधि मन्त्रालयको कार्यभार मन्त्री खतिवडाले सम्हाल्ने विज्ञप्तिमा जनाइएको छ ।

राष्ट्रियसभा सदस्य मध्ये दुई वर्षे कार्यकाल पूरा गरेका १९ जनाको पदावधि हिजो सकिएको थियो । गोलाप्रथाबाट दुई वर्षे कार्यकाल पाउनु भएका डा खतिवडासहित १९ जनाको पदावधि सकिएको हो ।

संविधानको धारा ७८ को उपधारा १ मा ‘राष्ट्रपतिले प्रधानमन्त्रीको सिफारिसमा संघीय संसदको सदस्य नभएको कुनै व्यक्तिलाई मन्त्री पदमा नियुक्त गर्न सक्ने ‘ उल्लेख छ । तर नियुक्त मन्त्रीले शपथग्रहण गरेको मितिले छ महीनाभित्र संघीय संसदको सदस्यता प्राप्त गर्नुपर्ने व्यवस्था उपधारा २ मा उल्लेख गरिएको छ ।