थारु पहिचान संरक्षणमा एकजुट हुन तीन प्रदेशका अगुवाको आह्वान

दाङ, ३० वैशाख । यहाँ भेला भएका तीन प्रदेशका थारु अगुवाले समुदायको मौलिक पहिचान, भाषा, संस्कार र संस्कृति संरक्षणका लागि सबै थारु समुदाय एकजुट हुनुपर्ने निष्कर्ष निकालेका छन् ।

सोमबार र मङ्गलबार जिल्लाको दङ्गीशरण गाउँपालिका–३ चखौरामा सम्पन्न अन्तरप्रदेशस्तरीय सम्मेलनले यस्तो निष्कर्ष निकालेको हो । मटवा, बरघर तथा भलमन्सा सङ्घको आयोजनामा भएको सम्मेलनपछि बुधबार संयुक्त अपिल जारी गर्दै थारु समुदायको मौलिकता संरक्षणमा समुदाय स्वयं सक्रिय हुनुपर्ने र तीनै तहका सरकारले पनि थारु पहिचान संरक्षणसँगै पर्यटन प्रवद्र्धनमा ध्यान दिनुपर्ने उल्लेख गरिएको छ ।

सङ्घका उपाध्यक्ष धिरेन्द्र चौधरी, बेसका कार्यवाहक अध्यक्ष यज्ञराज चौधरी, थारु सांस्कृतिक संरक्षण केन्द्रका अध्यक्ष राजेश चौधरी तथा थारु कल्याणकारिणी सभाका उपाध्यक्ष प्रभात चौधरीद्वारा जारी संयुक्त अपिलमा थारु समुदायले आफ्नै परम्परा र चलनअनुसार विवाह संस्कारलाई निरन्तरता दिनुपर्ने उल्लेख गरिएको छ ।

पछिल्लो समय थारु समुदायको विवाह संस्कृति हराउँदै गएको भन्दै त्यसको संरक्षण र प्रवद्र्धन गर्ने व्यक्तिलाई पुरस्कारको व्यवस्था गरिएको सङ्घका उपाध्यक्ष चौधरीले बताउनुभयो ।
उहाँले थारु समुदायका पूजा–आजा, नाचगान तथा खानपान संस्कृतिको संरक्षण गर्न आवश्यक रहेको बताउनुभयो । साथै स्थानीय तहलाई थारु समुदायका नामबाट नामकरण भएका टोल तथा बस्तीका नाम नहटाउन र थारु पहिचान मेटिने गतिविधि नगर्न आग्रह गरिएको छ ।

थारु समुदायका परिकार, हस्तकला तथा अन्य मौलिक सामग्रीको उत्पादन र बजारीकरणमा प्रोत्साहन गर्नुपर्नेमा पनि जोड दिइएको छ । सम्मेलनले मटवा, बरघर तथा भलमान्सा सम्बन्धी विधेयक पारित गरी थारु समुदायको संस्कार र संस्कृतिको संरक्षणमा राज्यले विशेष ध्यान दिनुपर्ने मागसमेत गरेको छ ।रासस