अन्तर विद्यालय फुटसलको उपाधी वाल्मिकीलाई

चितवन । भरतपुर–१२ स्थित ग्रीनल्याण्ड पब्लिक स्कुलको रजत महोत्सवको अवसरमा आयोजित जिल्ला स्तरीय अन्तर विद्यालय फुटसल प्रतियोगिताको उपाधी वाल्मिकी शिक्षा सदनले जितेको छ । प्रतियोगिता अन्तर्गत बुधबार सम्पन्न फाइनल खेलमा सनराइज बोर्डिङलाई ५–० को फराकिलो अन्तरले पराजित गर्दै वाल्मिकीले उपाधी उचालेको हो । बिजेता बनेको वाल्मिकीले शिल्ड, मेडल र प्रमाणपत्र प्राप्त गरेको छ ।

त्यस्तै, वाल्मिकीकै हिमांशु थापा प्रतियोगिताकै उत्कृष्ट खेलाडी बनेका छन् । विजेतालाई ग्रीनल्याण्ड पब्लिक स्कुलकी प्राचार्य इन्दिरा कार्कीले पुरस्कार प्रदान गर्नुभयो । पुरस्कार वितरण गर्दै प्राचार्य कार्कीले विद्यार्थीहरुलाई अध्ययन अध्यापनसँगै अतिरिक्त कृयाकलापहरुमा सहभागी गराउन आवश्यक हुनेमा जोड दिनुभयो । विद्यार्थीको रुची अनुसारनै उनीहरुलाई अघि बढ्न दिनुपर्ने उहाँको भनाई थियो ।

राजत महोत्सव अन्तर्गत बिहीवार श्रीपञ्चमी विशेष कार्यक्रम तथा सहिद दिवस, १७ गते प्राथमिक तहको साँस्कृतिक कार्यक्रम, १९ गते जिल्ला स्तरीय अन्तर विद्यालय हाजिरी जवाफ प्रतियोगिता तथा २० गते जिल्ला स्तरीय अन्तर विद्यालय बिज्ञान प्रदर्शनी गरिने प्राचार्य कार्कीले जानकारी दिनुभयो ।

यस्तै २१ गते निर्माणाधीन गौतमबुद्ध अन्तरराष्ट्रिय क्रिकेट रङ्गशालालाई आर्थिक सहयोग, २२ गते भूतपूर्व विद्यार्थी पुनर्मिलन समारोह र अन्तिम दिन २५ औं वार्षिकोत्सव तथा रजत महोत्सव समारोह गरिने ग्रीनल्याण्ड पब्लिक स्कुलले जनाएको छ ।