एक हप्तादेखि भरतपुरमा जारी लोडसेडिङ अन्त्य, भोलिदेखि विद्युत नियमित हुने

भरतपुर :

विगत एक हप्तादेखि भरतपुरमा जारी लोडसेडिङ अन्त्य भएको छ । भरतपुरमा भोली (शुक्रवार) देखि विद्युत नियमित हुने भएको हो । नेपाल बिद्युत प्राधिकरण भरतपुर वितरण केन्द्रले ट्रान्सफर्मरको क्षमता बिस्तारको काम सकिएकाले विद्युत नियमित हुने जनाएको छ । एक हप्तादेखि ट्रान्सफर्मरको क्षमता बिस्तारका लागि पटक–पटक विद्युत कटौती हुँदै आएको थियो ।

भरतपुर महानगरपालिका वडा नं. ११ भोजाडमा रहेको सबस्टेशनमा रहेको १५ एमभिएको ट्रान्सफर्मरले गर्मी समयमा बढी बिद्युत खपत हुँदा लोड नधानेपछि क्षमता बृद्धि गरी ३० एमभिएको ट्रान्सफर्मर परिवर्तन गरिएको हो । ट्रान्सफर्मर राख्ने काम सकिएको र आज (विहिवार) आधा क्षमताबाट संचालन भइसकेको नेपाल विद्युत प्राधिकरण भरतपुर बितरण केन्द्रका प्रमुख सुरेशकुमार महतोले जानकारी दिनुभयो । उहाँले प्राबिधिक रुपमा कुनै समस्या नआए भोली (शुक्रबार)बाट भरतपुरको विद्युत नियमित हुने बताउनुभयो ।

गर्मी समयमा १५ एमभिएको ट्रान्सफर्मरट्रान्सफर्मरको क्षमता बिस्तारकाले लोड नधान्दा भरतपुर क्षेत्रमा लाइन काट्नुपर्ने समस्या थियो । ट्रान्सफर्मरको क्षमता बिस्तारसँगै यो समस्या अन्त्य भएको छ । भोजाडको सबस्टेशनबाट भरतपुर र नारायणगढको बजार क्षेत्रमा विद्युत आपूर्ति हुँदै आइरहेको छ ।

प्राधिकरणले भोजाड सबस्टेशनमा रहेको अर्को २२ एमभिएको ट्रान्सफर्मरलाई पनि बिस्थापन गरेर ३० एमभिएको राख्ने योजना बनाएको छ । एक हप्तापछि अर्को ट्रान्सफर्मर परिवर्तन गर्ने योजना रहेको प्राधिकरणले जनाएको छ । दुवै ट्रान्सफर्मर परिवर्तन गरेपछि भरतपुर र नारायणगढ क्षेत्रमा विद्युत प्रवाह नियमित हुने अपेक्षा गरिएको छ । यस अघि भार क्षमता कम हुँदा ठूला विद्युतीय उपकरण सञ्चालन गर्न समस्या हुने गरेको थियो । जसले गर्दा समय समयमा विद्युत कटौती हुने समस्या रहेको थियो ।