त्रिशुली र नारायणी नदी किनारमा उच्च सतर्कता अपनाउन चितवन प्रशासनको आग्रह

चितवन, २४ असार । त्रिशूली तथा नारायणी नदीको जलस्तर बढेपछि जिल्ला प्रशासन कार्यालय चितवनले नदी किनार आसपासका बासिन्दालाई उच्च सतर्कता अपनाउन आग्रह गरेको छ। आज मंगलबार जारी गरिएको सार्वजनिक सूचनामा त्रिशूली नदीको मुहानतर्फको भू–भागमा भारी वर्षा भई जलस्तर बढ्न थालेको र यसको प्रभाव सडक, पुलपुलिया तथा नदी किनारका बस्तीमा पर्न सक्ने उल्लेख गरिएको छ।

नदी किनार आसपासका क्षेत्र, विशेष गरी त्रिशूली नदी तथा नारायणी नदी किनारका क्षेत्रमा बाढीको जोखिम रहेकाले स्थानीयरूपमा सूचना प्राप्त हुनासाथ सुरक्षित स्थानमा जान समेत प्रशासनले अनुरोध गरेको छ। सूचनामा भनिएको छ, “त्रिशुली नदी तथा नारायणी नदी किनारका क्षेत्रहरु झनै जोखिम हुनसक्ने भएकाले स्थानीयबासिन्दा, यात्री, यात्रुवाहक सवारी साधन चालक र निर्माणाधीन कार्यमा संलग्न व्यक्तिहरूले विशेष सतर्कता र सावधानी अपनाउनु हुन अनुरोध गरिन्छ।”

यदि कुनै आपत्कालीन अवस्था आएमा प्रहरीको कन्ट्रोल नं १०० वा जिल्ला आपत्कालीन कार्य सञ्चालन केन्द्रको फोन नं ९८४४२०८८८ मा सम्पर्क गर्न समेत प्रशासनले अनुरोध गरेको छ।