कामना सेवा विकास बैंकद्वारा भरतपुरमा विद्यार्थीलाई पोशाक वितरण

चितवन, ६ जेठ  । कामना सेवा विकास बैंक लिमिटेड, ज्योतिनगर शाखाले भरतपुर महानगरपालिका–२६ स्थित श्री राष्ट्रिय आधारभूत विद्यालय, खद्रौलीका ४५ जना विद्यार्थीलाई विद्यालय पोशाक वितरण गरेको छ। बैंकले आफ्नो सामाजिक उत्तरदायित्व कार्यक्रमअन्तर्गत यो सहयोग प्रदान गरेको हो। बैंकका ज्योतिनगर शाखा प्रवन्धक बिनोद सुवेदी र क्षेत्रीय कार्यालयका कर्मचारी प्रवीण बर्तौलाले बैंकले सामाजिक उत्तरदायित्वअन्तर्गत निरन्तर रूपमा सामाजिक कार्यमा सहयोग गर्दै आएको बताउनुभयो। “हामीले शिक्षा, स्वास्थ्य, र सामुदायिक विकासमा योगदान पुर्‍याउने लक्ष्य राखेका छौं। यस्ता कार्यक्रममार्फत हामी समाजमा सकारात्मक प्रभाव पार्न प्रतिबद्ध छौं,” बैंकका ज्योतिनगर शाखा प्रवन्धक सुवेदीले भन्नुभयो।

यो पहलले विद्यार्थीहरूको शैक्षिक वातावरण सुधार्न र उनीहरूको आत्मविश्वास बढाउन महत्वपूर्ण योगदान पुर्‍याउने अपेक्षा गरिएको छ। कामना सेवा विकास बैंकले आगामी दिनमा पनि यस्ता सामाजिक कार्यलाई निरन्तरता दिने प्रतिबद्धता जनाएको छ। विद्यालय व्यवस्थापन समितिका अध्यक्ष टोपबहादुर गुरुङको सभापतित्वमा सम्पन्न उक्त कार्यक्रमको सञ्चालन प्रधानाध्यापक रमाकान्त न्यौपानेले गर्नुभएको थियो। कार्यक्रममा विद्यालय व्यवस्थापन समितिका पदाधिकारी, बैंकका कर्मचारी, अभिभावक, र वडा नं. २६ का प्रतिनिधिहरूको उपस्थिति रहेको थियो।