भरतपुर–२३ मा नेपालकै नमूना पशुपतिधाम निर्माण गरिने, अर्थ सङ्कलनका लागि ज्ञानमहायज्ञ हुँदै

   संगिता बानिया

चितवन । नेपालकै नमूना पशुपति धाम निर्माण गर्ने उद्धेश्यका साथ नारायणी नदी किनारमा आगामी माघ ११ देखि फागुन ११ गतेसम्म कोटीहोम ज्ञानमहायज्ञ मेलाको तयारी गरिएको छ । ऐतिहासिक १०८ कुण्डीय कोटीहोम, शैक्षिक, धार्मिक तथा साँस्कृतिक तुलादान, माघीमेला महामहोत्सव एवम् सङ्गीतमय लीलामय अष्टोत्तरशत (१०८) श्रीमद्भागवत धनधान्याचल पितृमोक्ष विराट मासिक ज्ञान महायज्ञ गर्न लागिएको आयोजक समितिले जानकारी दिएको छ ।

पर्यटन वर्ष सन् २०२० लाई लक्षित गरी भरतपुर–२३, जगतपुरस्थित पशुपतिनाथ मन्दिरलाई वृहत् धामको रुपमा विकास गर्ने, आयुर्वेदिक शिक्षालय स्थापना गर्ने र क्यान्सर रोगबाट पीडित विपन्न परिवारलाई सहयोग गर्ने उद्धेश्यका साथ महायज्ञ सञ्चालन गर्न लागिएको महायज्ञ मूल आयोजक समितिले जनाएको छ ।

भागवत वाचन श्रीमद्भागवत कथा प्रवक्ता वालयोगेश्वर महाराजले गर्नुहुने बताइएको छ । १०८ पण्डितद्वारा एक करोड २५ लाख मन्त्र जपसहित अनवरत रुपमा एक महिनासम्म विशेष जडिबुटिद्वारा हवन गरिने, वेद, १८ पुराण, १०८ श्रीमद्भागवत महापुराणको पाठ–पारायण महायज्ञको प्रमुख आकर्षण रहने छन् । साथै २१ करोड दीप प्रज्वलन, १ करोड पार्थिव शिवलिङ्ग निर्माण तथा पूजन, हेलिकप्टरबाट मुक्तिनाथ हुँदै १०८ तीर्थको जल र १ हजार आठ गौमाताको दुग्ध धारासहित कालिगण्डकी र नारायणीमा दुग्धभिषेकका साथै कार्यक्रम परिसरमा पुष्पवृष्टि गरिने कथा वाचक वालयोगेश्वर महाराजले बताउनुभयो ।

देशैभरका १० लाख भक्तजनको उपस्थिति रहने गरि निमन्त्रणा पठाईएको आयोजकले जनाएको छ । प्रत्येक भक्तालुले कम्तिमा एक हजार रुपैयाँ दान गर्ने आयोजकको दावी छ । नारायणी नदी किनारमा लाग्ने कोटीहोम यज्ञमा आध्यात्मिक साधना हुने बताईएको छ ।