पत्रकार ढकालद्वारा आमाको नाममा आश्रितलाई खाना

चितवन, १६ असोज । पत्रकार नवराज ढकालले स्वर्गीय आमा मायादेवी ढकालको नाममा आज चितवन मानव सेवा आश्रमका आश्रितहरुलाई खाना खुवाउनु भएको छ । भरतपुर महानगरपालिका वडा नं. ७ कृष्णपुरमा रहेको आश्रममा रहेका ४७ जना आश्रितहरुलाई उहाँले खाना खुवाउनु भएको हो ।

उहाँले भन्नुभयो “आमा मुख्य खम्बा नहुँदा दशैं खल्लो छ, रमाईलो छैन, आमाको स्मरणमा आश्रममा रहनु भएका आमाहरुलाई भोजन गराएँ ।” आफ्नो सानो सहयोगले आश्रमलाई पनि सहयोग हुने भन्दै उहाँले सबैले यस्तो प्रकारको सहयोग गर्नुपर्ने बताउनुभयो ।

सो अवसरमा बुबा भोलानाथ ढकाल, श्रीमती जानुका ढकाल, छोरी बिनिता ढकाल, छोरा विजन ढकाल र नाति जेविन ढकाल सँगै रहनु भएको थियो । उहाँका जेठो छोरा विनय र बुहारी प्रेजु ढकाल जापान हुनुहुन्छ । परिवारका सबैले आमाको सम्झना गर्दै खाना खुवाएका पत्रकार ढकालले बताउनुभयो ।