बाढीमा फसेका दूधे बच्चा बोक्दै उद्धारमा नगर प्रमुख

रत्ननगर (चितवन), १३ असोज । बाढीको वितण्डासँगै एक नगर प्रमुखले दूधे बालक च्यापेर उद्धार गर्दै गरेको तस्वीर सामाजिक सञ्जालमा भाईरल भएको छ । रत्ननगर नगरपालिकाका मेयर प्रलाद सापकोटाले डुंगामा चढेर सुकुम्बासी वस्तीबाट एक नाबालकसहितका परिवारलाई उद्धार गर्दै गरेको तस्वीरले धेरै प्रशंसा पायो ।

जनप्रतिनिधिबाट आम सर्वसाधारणले खोज्ने अपेक्षा धेरै होलान् तर उदाहरणीय काम एउटैले पनि धेरैको मन जित्न सक्छ । त्यस्तै उदाहरणीय काम गरेकै कारण यतिबेला मेयर सापकोटा रत्ननगरवासीको लागि मात्रै होइन, सिंगै देशभरवासीका लागि उदाहरणीय जनप्रतिनिधि बन्नु भएको छ ।

रत्ननगर नगरपालिका वडा नं. ८ रमाइलो सुकुम्बासी वस्तीका २७ घरधुरीका १२५ जनालाई प्रमुख सापकोटाको टोलीले शनिबार उद्धार गरेको थियो । उहाँले भन्नुभयो “बुढी राप्ती वस्ती पसिकेको थियो । थोरै ढिलो भएको भए ठूलो क्षति हुन्थ्यो ।” आमाले दूध चुसाईरहेको १० महिनाको बालक प्रमुख सापकोटाले काखमा च्यापेर अरुसँगै काठको डुंगाबाट उद्धार गर्नुभएको थियो ।

उहाँले थप्नुभयो “जब हामीले सबैलाई बाहिर ल्यायौं, त्यसपछिको बाढी देखेर मेरो मुटु हल्लियो । मैले निकै जोखिम मोलेँ भन्ने मलाई लाग्यो । तर धेरै सन्तुष्ट छु ।” बाढीसँगै बगेर आएका सर्प र धमिलो पानीमा भित्रभित्रै आउने गोहीको प्रवाह नगरी उहाँ उद्धारमा खटिनु भयो । त्यसो त पानीमा आएका सर्पलाई धकेल्दै उहाँ वस्तीसम्म पुग्नुभयो ।

मेयरसँगै त्यहाँ पुगेका अरु अग्लो ठाउँमा बसेर हेरिरहँदा उहाँ बाढीमा डुंगा लिएर गएको स्थानीय पत्रकार होमनाथ सापकोटाले बताउनुभयो । उहाँले भन्नुभयो “प्रमुख सापकोटा र म डुंगामा जोखिम मोलेरै भए पनि गयौं, र बचाउन सक्यौं ।” त्यतिबेला बुढी राप्तीको बाढीले घाँटीघाँटी पानी आईसकेको थियो । बाघमारा सामुदायिक वनबाट काठको डुंगा मगाएर उद्धार गरिएको हो ।

उद्धार गर्न उपप्रमुख यादवप्रसाद पाठक, वडा नं. ७ का अध्यक्ष सजना महतो, बाघमारा मध्यवर्ती सामुदायिक वनका अध्यक्ष जितु तामाङ लगायत पनि त्यहाँ पुग्नु भएको थियो । उद्धार गरिएकालाई ग्रिन सोसाईटीको भवनमा राखिएको छ । आज बाढी घट्दै गएको प्रमुख सापकोटाले जानकारी दिनुभयो ।