शिक्षकले फलामको स्केल प्रहार गर्दा विद्यार्थी टाउकोमा चोट

सुर्खेत, १७ असार । शिक्षकको कुटाइबाट सल्यानका एक विद्यार्थी टाउकोमा चोट लागेको छ । आइतबार सल्यानको त्रिवेणी गाउँपालिका–६ लुहाममा रहेको बल्यान पब्लिक स्कुलमा कक्षा ६ मा अध्ययनरत विद्यार्थी अरुण विकलाई शिक्षकले कुटेका थिए ।

अरुणलाई कक्षा चलेका बेला खेलेको भन्दै शिक्षक चन्द्रबहादुर डाँगीले फलामको स्केलले हानेका हुन्। फलामको स्केल प्रहारबाट उनको टाउकोमा चोट लागेको हो।

घाइते अरुणलाई तत्काल स्थानीय मेडिकलमा उपचारका लागि लगिएको थियो। मेडिकलमा टाँका लगाउने सामान नभएपछि जिल्ला अस्पताल लगिएको त्रिवेणी गाउँपालिका–६ का वडाध्यक्ष मनोज शाहले बताए।

गाउँपालिकाका अध्यक्ष खिमबहादुर रावतले घटनाको बारेमा बुझ्न इलाका प्रहरी कार्यालयलाई भनेको बताए।

‘हामीलाई सुरुमा खबर गरिएन, पछि बुझ्दा ढाडमा हान्न खोजेको स्केलले अन्यत्रै लागेको भनेर विद्यालयले मलाई भनेको थियो,’ अध्यक्ष रावतले भने, ‘विद्यालयमा बालमैत्री वातावरण सिर्जना विद्यार्थीलाई त्यहीअनुसार व्यवहार गर्नुपर्नेमा कुटपिट गर्नु राम्रो होइन, यो विषयमा कानुनी प्रावधानअनुसार शिक्षकलाई कारबाही गर्नुपर्छ।’

स्रोतः सेतोपाटी