सेन्ट्रल कलेजको मुख्य प्रायोजनमा भरतपुर मेयर कपको उद्घाटन, आज उद्घाटन खेल

भरतपुर, २८ वैशाख । भरतपुर महानगरपालिकाको आयोजना र सेन्ट्रल कलेजको मुख्य प्रायोजनमा भरतपुर मेयर कप अन्तर विद्यालय फुटबल लिग सुरु भएको छ । आज शुक्रबारबाट सुरु भएको लिगको उद्घाटन खेलमा स्टेप बाई स्टेप र ओम शान्ति एकेडेमीले गोलरहित बराबरी गर्दै अंक बाँडेका छन् । दुबै टिमले पाएका केही अवसर खेर फाल्दा अंक बाँड्न वाध्य भएका हुन् ।

लिगमा शनिबार कुनै खेल हुने छैन । आइतबार भने दुई खेल हुनेछ । आइतबार समूह एका ढड्डाघारी मावि र गौरीगन्ज मावि भिड्नेछन् । खेल दिउँसो ४ः३० बजे कृष्णपुरको मैदानमा हुनेछ । सोही समयमा समूह बीका ग्रीनल्याण्ड पब्लिक स्कुल र सिद्धार्थ मावि भिड्ने छन् । खेल अमर मावि पाटिहानीमा हुनेछ ।

्चितवन जिल्ला फुटबल संघ सहआयोजक रहेको लिग जेष्ठ १९ गतेसम्म चल्नेछ । प्रतियोगितामा भरतपुर महानगरपालिका भित्र १२ सामुदायिक तथा १२ संस्थागत गरी २४ विद्यालय सहभागी छन् । सहभागी २४ विद्यालयलाई छ समूहमा विभाजन गरिएको छ । सबै समूहका टिमले होम एण्ड अवेका आधारमा एक अर्कासँग प्रतिस्पर्धा गर्नेछन् । छ समूहबाट समूह विजेतामध्ये उत्कृष्ट चार विद्यालय सिधै क्वाटरफाइनल प्रवेश गर्नेछन् । बाँकी दुई समूह विजेता र छ समूह उपविजेता गरी आठ टोली प्रिक्वाटरफाइनल प्रवेश गर्नेछ ।

यस अघि लिगको उद्घाटन गर्दै महानगर प्रमुख रेणु दाहालले यस लिगले राष्ट्रिय खेलाडी उत्पादनमा सहयोग पुग्ने विश्वास व्यक्त गर्नुभयो । दाहालले दैनिक भइरहेका खेलकुद प्रतियोगिताले भरतपुर खेलकुदको हब बन्दै गएको पुष्टि गरेको बताउनुभयो ।

मुख्य प्रायोजक सेन्ट्रल कलेजका प्रिन्सिपल वाईवी पौडेलले सेन्ट्रल कलेजले शिक्षा र खेलकुद क्षेत्रका लागि योगदान गर्दै आएको बताउनुभयो । उहाँले चितवनको समग्र खेल क्षेत्रमा सेन्ट्रल कलेज सधैं साथमा रहेको बताउनुभयो । उहाँले यस्ता कार्यक्रमले नयाँ प्रतिभा उत्पादन गर्न योगदान दिनु हुँदा सेन्ट्रल कलेज मुख्य प्रायोजक बनेको न्यूजभित्तोलाई बताउनुभयो ।