नौ अर्ब घाटाको प्राधिकरण अहिले सात अर्ब नाफामा : कुलमान घिसिङ

बनेपा । नेपाल विद्युत् प्राधिकरणका कार्यकारी निर्देशक कुलमान घिसिङले वार्षिक रुपमा नौ अर्ब घाटामा रहेको प्राधिकरणले अहिले सात अर्ब रुपैयाँ नाफा कमाएको बताउनुभएको छ ।

धुलिखेल उद्योग वाणिज्य सङ्घ धुलिखेलले तिहार, नेपाल संवत ११४० र छठ पर्वको अवसरमा आयोजना गरेको शुभकामना आदानप्रदान कार्यक्रमा उहाँले प्राविधिक र व्यवस्थापकीय क्षेत्रमा सुधार गर्दा विद्युत कटौती अन्त्य गर्न सफल भएको दावी गर्नुभयो । प्राधिकरणलाई आगामी वर्ष दश अर्ब नाफामा पुर्याउने र यस वर्षमा ४० वटा जिल्लालाई पूर्ण विद्युत् सेवा पुगेको जिल्ला घोषणा गर्ने तयारीमा रहेको उहाँको भनाइ छ ।

“हामीले विद्युत्भार कटौती मात्रै अन्त्य गरेनौँ” उहाँले भन्नुभयो, “अब विद्युत् अपुगभन्दा पनि पर्याप्त भएकाले सक्नेजति खपत गर्न आम उपभोक्तालाई आग्रह गर्दछु ।” सरकार, ऊर्जा मन्त्रालय र सबैको प्रयासले लोडसेडिङ अन्त्य गर्न सकेको उल्लेख गर्दै उहाँले अब भएको विद्युत्लाई उपभोग गर्न आम उपभोक्तालाई आग्रह गर्नुभयो । तीन वर्षमा १२ लाख ग्राहक बनाउन सफल भएको उहाँले बताउनुभयो ।

उहाँले अब विद्युत् नै नपुगेको ठाउँमा विद्युत् पुर्याउने अभियानमा लागेको विद्युत् प्राधिकरणले अझैपनि ४० प्रतिशत विद्युत् सेवा पुर्याउन बाँकी रहेको काभ्रेपलाञ्चोक जिल्लामा आगामी दुई वर्षमा शतप्रतिशत विद्युत् सेवा पुर्याउने बताउनुभयो ।

ऊर्जा, जलस्रोत तथा सिँचाइ मन्त्रालयका सचिव रवीन्द्रनाथ श्रेष्ठले बस्ती विस्तार गर्नुभन्दा पहिला नै सरकारले सबै प्रकारको विकासको व्यवस्थापन नभएका कारण पछि गर्ने काममा निकै समस्या आइपर्ने गरेको बताउनुभयो । कार्यक्रममा उद्योग वाणिज्य सङ्घ प्रदेश नं ३ का अध्यक्ष दिनेश श्रेष्ठ र धुलिखेल उद्योग वाणिज्य सङ्घका सल्लाहकार दिलसुन्दर श्रेष्ठ लगायतले शुभकामना मन्तव्य व्यक्त गर्नुभएको थियो ।