नारायणी पब्लिकको वार्षिकोत्सवमा वक्तृत्वकला प्रतियोगिता, सैनिक आमावि प्रथम

भरतपुर, १ फागुन । नारायणी ईङ्गलिस पब्लिक स्कुलले आफ्नो २९औं वार्षिकोत्सवको अवसरमा जिल्लास्तरीय वक्तृत्वकला प्रतियोगिता सम्पन्न गरेको छ । हरेक वर्ष जस्तै यस वर्ष पनि विद्यालयले वार्षिकोत्सवको अवसरमा विभिन्न जिल्लास्तरीय प्रतियोगितात्मक कार्यक्रमहरु आयोजना गरेको हो ।

आज सम्पन्न वक्तृत्वकला प्रतियोगितामा “म मेयर भएको भए…” भन्ने शीर्षकमा उत्कृष्ट प्रस्तुती राख्दै सैनिक आवासीय मा.वि कि छात्रा मन्जिला तिमिल्सिना प्रथम भएको छन् । यस्तै स्मल हेवन स्कुल कल्याणपुरकी छात्रा प्राची शिवाकोटी दोस्रो, सनराइज ई. स्कुलकी छात्रा सजिना खड्का तेस्रो र नेपाल पुलिस स्कुल शान्तिपुरकी छात्रा यूनिसा थपलियाले सान्तोना स्थान हासिल गर्नुभयो ।
उक्त कार्यक्रमको सभापतित्व विद्यालयका अध्यक्ष एवम् प्रवन्ध निर्देशक राजेश्वर खनालले गर्नु भएको थियो भने प्रमुख अतिथि भरतपुर महानगरपालिका उप—प्रमुख चित्रशेन अधिकारी रहनु भएको थियो । कार्यक्रमको विशिष्ट अतिथिमा भरतपुर महानगरपालिका वडा नं ११ सदस्य लालमाया लामा, अतिथिहरुमा विद्यालयका प्राचार्य वेदराज न्यौपाने, प्याब्सन चितवनका सदस्य दयानिथि अर्याल, बेसका गणित विभागीय प्रमुख ऋषी घिमिरे हुनुहुन्थ्यो ।

यसैगरी नारायणी पब्लिक कलेजका एकेडेमिक हेड प्रकाश सिग्देल र विद्यालयका निर्देशक एवं लेखा प्रमुख अनिता खनाल अतिथि रहनुभएको थियो ।

कार्यक्रममा विद्यालयका प्राचार्य न्यौपानेले स्वागत गर्नुभएको थियो भने प्रमुख अतिथि अधिकारीले यस्तो खालको कार्यक्रमले विद्यार्थीहरुको नेतृत्व सहित व्यक्तित्वको पनि विकास हुने बताउनु भयो । सभापति खनालले विद्यार्थीहरुले किताबको ज्ञान मात्र नभएर मेयर भएको भए के गर्थे अथवा अरु केही भएको भए के गर्थे भन्ने कुराको पनि ज्ञान हुन जरुरी रहेको बताउनुभयो । कार्यक्रमको संयोजन विद्यालयका प्राथमिक तह प्रमुख दिवाकर पौड्यालले गर्नुभएको थियो ।