प्रमोद, मेलिना र सुमनले न्यू–जिल्याण्डको क्यान्टवरीमा दशैं धमाका मच्चाउने

क्यान्टवरी (न्यू–जिल्याण्ड), ९ अक्टोबर । गायक प्रमोद खरेल, मेलिना राई र सुमन कार्कीले न्यू–जिल्याण्डको क्यान्टवरीमा दशैं धमाका मच्चाउने भएका छन् । दशैंको फूलपातीको दिन २१ अक्टोवरमा दशैं धमाका कार्यक्रम हुन लागेको हो ।

क्यान्टवरी नेप्लिज सोसाइटी र नेपाल न्यू–जिल्याण्ड फ्रेण्डसीप सोसाइटीको संयुक्त आयोजनामा “दशैं धमाका २०२३” आयोजना गरिएको छ । कार्यक्रममा नेपाली संगीत क्षेत्रका ख्यातीप्राप्त कलाकारहरु प्रमोद खरेल, मेलिना राई र सुमन कार्कीले बेजोड प्रस्तुत दिनुहुनेछ ।

क्यान्टवरीको क्राइस्टचर्चमा स्थानीय समय अनुसार साँझ ६ बजेदेखि ९ बजेसम्म हुने कार्यक्रममा स्थानीय सबै संघ संस्थाको सहयोग र समर्थन रहेको कार्यक्रम संयोजक एवं क्यान्टवरी नेप्लिज सोसाइटीका उपाध्यक्ष जीवन अर्यालले जानकारी दिनुभयो ।

उहाँका अनुसार कार्यक्रममा सात सयभन्दा बढीको सहभागिता हुने अपेक्षा गरिएको छ । हालसम्म ६ सयभन्दा बढी टिकट बिक्री भईसकेको उहाँले जानकारी दिनुभयो ।

नेपालका तीन जना हस्ती कलाकारको आगमन हुने र दुई वटा प्रमुख संस्थाहरुको आयोजना र अन्य संघ संस्थाको सहयोगमा कार्यक्रम हुन लागेकाले यसलाई महत्वका साथ हेरिएको अर्का संयोजक एवं नेपाल न्यू–जिल्याण्ड फ्रेण्डसीप सोसाइटीका कोषाध्यक्ष अमूल्य नेपालले बताउनुभयो ।

सिंगो क्यान्टवरी र यो क्षेत्रको नजिकमा रहेका सबै नेपाली दशैंको अवसरमा एउटै आँगमनमा रमाइलोमा सहभागी हुन पाउने भएकाले सबै उत्साहित भएको नेपालको भनाई छ ।

टिकटको मूल्य ३० न्यू–जिल्याण्ड डलर कायम गरिएको छ भने १० वर्ष मुनिका बालबालिकालाई निःशुल्क प्रवेशको व्यवस्था छ ।