पुष्पमदन स्मृति वनबाटिकामा स्काई चियर उद्घाटन

माडी (चितवन), १४ असार । माडी नगरपालिका वडा नं. ६ स्थित लक्ष्मीनिवासमा रहेका पुष्पमदन स्मृति वनबाटिकामा निर्माण गरिएको स्काई चियरको उद्घाटन गरिएको छ । आज एक कार्यक्रमको आयोजना गरी नगर प्रमुख ताराकुमारी काजी महतो र उपप्रमुख खेमप्रसाद महतोले चियरको उद्घाटन गर्नुभएको हो ।

कार्यक्रममा बोल्दै नगर प्रमुख महतोले वनबाटिका महत्वपूर्ण रहेको चर्चा गर्नुभयो । उहाँले जननेता मदन भण्डारीको अस्तु यही बिसर्जन गरिएको चर्चा गर्दै यसको विकासका लागि नगरपालिकाबाट सक्यो सहयोग गर्ने बताउनुभयो । उहाँले भन्नुभयो “नगरपालिकामा ठूलो आम्दानी छैन, थोरै थोरै भएपनि यसको विकासमा खर्च गर्छाै ।” उहाँले प्रदेश र केन्द्र सरकारबाट पनि वनबाटिकाको विकासका लागि बजेट ल्याउन पहल गर्ने बताउनुभयो ।

माडीमा थुप्रै पर्यटकीय स्थल रहेको बताउँदै नगर प्रमुख महतोले पुष्पमदन स्मृति वनबाटिका पनि एक महत्वपूर्ण पर्यटकीय स्थल बनेको बताउनुभयो ।

वनबाटिकाका अध्यक्ष श्याम बिष्टको अध्यक्षतामा भएको कार्यक्रममा उपाध्यक्ष फणिन्द्र दवाडीले स्वागत गर्नुभएको थियो । कार्यक्रममा माडी नगरपालिकाका प्रमुख प्रशासकीय अधिकृत शेषकान्त पौडेल, मदन भण्डारी फाउण्डेशन चितवनका अध्यक्ष डा. तिलचन्द्र भट्टराई लगायतको सहभागी रहेको थियो ।

माडी नगरपालिकाको रु. १० लाख बजेटमा स्काई चेयर र माडी एयरलायन्स झुला निर्माण गरिएको हो । स्काई चेयरमा रु. एक सय र झुलामा रु. ५० टिकट राखिएको सो अवसरमा जानकारी दिईयो । सोही अवसरमा वनबाटिकामा वृक्षारोपण समेत गरिएको थियो ।