मदन जयन्तीमा पुष्प मदन स्मृति वनबाटिकामा वृक्षारोपण

माडी (चितवन), १४ असार । ७२ औं मदन जयन्तीको अवसरमा माडी नगरपालिका वडा नं. ६ लक्ष्मी निवासस्थित पुष्प मदन स्मृति वनबाटिकामा वृक्षारोपण गरिएको छ । मदन भण्डारी फाउण्डेशन चितवनले चिउरीका विरुवा रोपण कार्यक्रम आयोजना गरेको हो ।

कार्यक्रमका प्रमुख अतिथि नेकपा एमाले केन्द्रीय सदस्य तथा माडी नगर इञ्चार्ज यमबहादुर परियारले समग्र विश्व कम्युनिष्ट आन्दोलन धुरमुराईरहेको समयमा मदन भण्डारीले जनताको बहुदलीय जनवादको प्रतिवादन गरेर नविन सोचका साथ कम्युनिष्ट आन्दोलनलाई अघि बढाएको बताउनुभयो । उहाँले जनताको बहुदलीय जनवाद (जबज) मा नेपाली मौलिक कार्यदिशा रहेको चर्चा गर्दै अहिलेको पुस्ताले जबज बुझ्न जरुरी रहेको बताउनुभयो ।

नेपाल कम्युनिष्ट आन्दोलन एमालेको वरिपरि ध्रुविकृत भएको भन्दै उहाँले जबजबाट समाजवादको यात्रा तय गर्दै नेपाली जनतालाई मुक्ति र समृद्धिको बाटोमा लैजान सकिने बताउनुभयो ।

पूर्व प्रदेश मन्त्री दावा लामाले मदन भण्डारीले विश्व कम्युनिष्ट आन्दोलनलाई नयाँ मोड लिएको चर्चा गर्नुभयो । कार्यक्रममा माडी नगर प्रमुख ताराकुमारी काजी महतो, एमाले केन्द्रीय सल्लाहकार रमाकान्त सापकोटा, एमाले माडी नगर कमिटी अध्यक्ष नारायण अधिकारी लगायतको उपस्थिति थियो ।

फाउण्डेशनका सचिव श्याम बिष्ट सञ्चालन गर्नुभएको कार्यक्रममा बरिष्ठ उपाध्यक्ष शम्भु सुवेदीले स्वागत गर्नुभएको थियो । कार्यक्रमका सभापति एवं फाउण्डेशनका अध्यक्ष डा. तिलचन्द्र भट्टराईले जबजमा भएका महत्वपूर्ण विषयमाथि चर्चा गर्नुभएको थियो ।

कार्यक्रममा पुष्प मदन स्मृति वनबाटिकाका पदाधिकारी तथा सदस्यहरु, माडीका स्थानीयहरुको बाक्लो उपस्थिति थियो ।